ԵՐԵՎԱՆ, 12 հունիսի. /Նովոստի-Արմենիա/. «Հազարամյակի մարտահրավերներ. Հայաստան» հիմնադրամի կողմից գյուղական ճանապարհների շինարարության ծրագրի ֆինանսավորման դադարեցումը կապված է Երևանի ավագանու խորհրդի ոչ ժողովրդավարական ընտրությունների հետ, կարծում է ՀՀ նախկին վարչապետ Հրանտ Բագրատյանը։
«Հազարամյակի մարտահրավերներ» ամերիկյան կորպորացիան ՀՀ գյուղական ճանապարհների շինարարության ծրագրի ֆինանսավորումը դադարեցրել է՝ իր որոշումը պատճառաբանելով նրանով, որ հանրապետության իշխանությունների ձեռնարկած քայլերը չեն համապատասխանում ժողովրդավարական կառավարման չափանիշներին։ «Եթե ընտրությունները նորմալ լինեին, ապա հիմնադրամը ոչ մի հիմնավորում չէր ունենա ծրագիրը դադարեցնելու համար»,- հայտարարեց Բագրատյանը։
«Հազարամյակի մարտահրավերներ» ամերիկյան կորպորացիայի ծրագիրը Հայաստանում մեկնարկել է 2006 թ.-ի սեպտեմբերի 29-ին։ Ծրագրի համաձայն՝ Հայաստանը պետք է 5 տարում կորպորացիայից 235,65 մլն դոլար գումար ստանար գյուղական ենթակառուցվածքների զարգացման համար, մասնավորապես, համայնքային նշանակության ճանապարհների ու ոռոգման համակարգի վերականգնման համար։
Գյուղական ճանապարհների ծրագրի ֆինանսավորման հարցը, որի ընդհատման մասին նախօրեին հայտարարեց «Հազարամյակի մարտահրավերներ» ամերիկյան կորպորացիան, կարող է քննարկման դրվել պետական ոչ կոմերցիոն կազմակերպությունների այսօրվա նիստի ժամանակ։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։ Ավագանու խորհրդում տեղերի բացարձակ մեծամասնություն հավաքած Հայաստանի հանրապետական կուսակցությունն ավտոմատ կերպով Երևանի քաղաքապետ է նշանակում կուսակցության ցուցակի առաջին համարի տակ ներկայացված թեկնածուին՝ Գագիկ Բեգլարյանին
ՀՀԿ-ն խորհրդում ստացավ 35 մանդատ, «Բարգավաճ Հայաստանը»՝ 17, ՀԱԿ-ը՝ 13 մանդատ: Միաժամանակ ՀԱԿ-ը հրաժարվեց իր մանդատներից: --0--
