Հայաստանը կարող է օգտագործել ռուսական հաջող փորձը հեղինակային իրավունքի պաշտպանության ոլորտում. պատգամավոր
ԵՐԵՎԱՆ, 10 հունիսի. /Նովոստի-Արմենիա/. Հայաստանը կարող է օգտագործել ռուսական հաջող փորձը հեղինակային իրավունքի պաշտպանության ոլորտում, հինգշաբթի «Նովոստի-Արմենիա» գործակալությանը հայտնեց ՀՀ Գիտության, կրթության, մշակույթի, երիտասարդության և սպորտի հարցերի ԱԺ մշտական հանձնաժողովի նախագահ Արտակ Դավթյանը։
Մեկնաբանելով Ռուսաստանում առանց լրատվական գործակալություններին հղում անելու հաղորդագրությունների մեջբերումն արգելող օրենքի ընդունման հնարավորությունը՝ հանձնաժողովի ղեկավարն ասաց, որ օրենքը կնպաստի հեղինակային իրավունքների պաշտպանությանը, և խնդրի լուծման բավական հետաքրքիր մոտեցում է։
«Մեր հանձնաժողովն այս ոլորտը վերահսկելու լիազորություններ ունի, և ես անձամբ կհետևեմ իրավիճակի զարգացմանը Ռուսաստանում։ Եթե մենք համարենք, որ նմանատիպ որոշումը Հայաստանում խելամիտ և օգտակար կլինի, ապա բացառված չէ, որ մենք նման փորձ կիրառենք մեր երկրում»,- նշեց Դավթյանը։
Հանձնաժողովի նախագահի խոսքերով, հեղինակային իրավունքի պաշտպանության ոլորտում մեծ լիազորություններ ունի նաև պետաիրավական հարցերի հանձնաժողովը, որտեղ արդեն գրագողության համար պատասխանատվություն նախատեսող օրինագիծ է պատրաստվում։
Դավթյանը տեղեկացրեց, որ հանձնաժողովում բավական լուրջ քննարկումներ են տարվում, իսկ օրինագծի մշակման ժամանակ հաշվի են առնվել գրական և գեղարվեստական ստեղծագործությունների պահպանության Բեռնի կոնվենցիայի նորմերը։
Ռուսաստանի կապի և զանգվածային հաղորդակցության նախարարությունը պատրաստել է առանց լրատվական գործակալությունների հղումների հաղորդագրությունների մեջբերումն արգելող օրինագիծ։ Նման խախտում թույլ տված քաղաքացիները կամ անձիքն ստիպված կլինեն վճարել 1000-ից մինչև 5000 ռուբլի։ -0-
