Հայաստանն աշխարհում ձիաբուծության առաջին կենտրոններից մեկն է եղել, հինգշաբթի «Նովոստի» միջազգային մամուլի կենտրոնում տեղի ունեցած մամուլի ասուլիսի ժամանակ ասաց ՀՀ մշակույթի նախարարությանն առընթեր Պատմամշակութային ժառանգության գիտահետազոտական կենտրոնի տնօրեն Հակոբ Սիմոնյանը։
Նրա խոսքերով, Պատմամշակութային ժառանգության գիտահետազոտական կենտրոնը հնագիտական պեղումներ է իրականացնում Երևանի տարածքում 2002թ.-ից ի վեր, ինչի արդյունքում հայտնաբերվել են բացառիկ ապացույցներ, որ դեռևս մ.թ.ա. 2500թ.-ին հայերը ձիեր էին բուծում ռազմական նպատակների համար։
«Այն մասին, որ հայերը ձիեր էին բուծում ռազմական նպատակների համար, վկայում են նաև պեղումների արդյունքում գտնված կենցաղային առարկաների վրա ձիերի և ռազմակառքերի պատկերները», - ասաց Սիմոնյանը։
Նրա խոսքերով, որոշ ինտերնետ-աղբյուրներ ձիաբուծության աշխարհի առաջին կենտրոնն են համարում Ղազախստանի Հյուսիսը, ինչը, հայ հնագետների կարծիքով, չի համապատաասխանում իրականությանը։
Գիտնականը նշեց, որ հնագիտական գտածոները թվագրվում են մ.թ.ա. 25-20-րդ դարերին, այսինքն այն ժամանակաշրջանին, երբ Հայաստանում արդեն պետականություն կար։
«Ձիերը բացառիկ նշանակություն ունեին Հին Աշխարհի կյանքում, և մենք ունենք բոլոր հիմնավորումները, որ Հայաստանն աշխարհում ձիաբուծության առաջին կենտրոններից է եղել», - ասաց նա։ Սիմոնյանն ընդգծեց, որ այժմ ավելի խոշորամասշտաբ պեղումներ են անհրաժեշտ։
«Պետությունը շուրջ 31 միլիոն դրամի (մոտավորապես 83 հազար ԱՄՆ դոլար) միջոցներ է հատկացրել՝ «Հնագույն քաղաքակրթությունների և վաղ պետականության ծագումը Հայաստանում» ծրագրի շրջանակներում հնագիտական ուսումնասիրություններ իրականացնելու նպատակով։ Կոնկրետ պեղումներ իրականացնելու համար տրամադրվել է այդ միջոցների մեկ երրորդը», - նշեց Սիմոնյանը՝ ավելացնելով, որ մինչև պետական օգնություն ստանալը յոթ դամբարան արդեն է ուսումնասիրվել։
Նրա խոսքերով, չնայած հարուստ պատմական ավանդույթին, ձիաբուծությունն այսօր Հայաստանում թույլ է զարգացած, քանի որ դա կապված է մեծ ծախսերի հետ, ինչը կարող են իրենց թույլ տալ միայն հարուստ և զարգացած երկրները։
«Մենք պատրաստում ենք մեր Կենտրոնի կայքը, որտեղ ներկայացված կլինեն մեր աշխատանքների արդյունքները։ Հուսով եմ, որ դա կօգնի համաշխարհային հանրությանը հասցնել հայկական պատմամշակութային ժառանգության մասին տեղեկատվությունը», - ավելացրեց նա։-0-
