Սանկտ Պետերբուրգյան հանդիպման մասին Ադրբեջանի նախագահի մոտ շրջանակների հայտարարությունները վկայում են ադրբեջանական քաղաքական վերնախավում առկա տարաձայնությունների մասին. ՀՀ ԱԳՆ
Հայաստանի և Ադրբեջանի նախագահների՝ Սանկտ Պետերբուրգում կայացած հանդիպման վերաբերյալ Ադրբեջանի նախագահին մոտ կանգնած շրջանակների վերջին հայտարարությունները վկայում են կամ դիրքորոշումների անհամաձայնության, կամ հարևան երկրի քաղաքական վերնախավում գոյություն ունեցող տարաձայնությունների մասին, կարծում է ՀՀ ԱԳ նախարար Էդվարդ Նալբանդյանը։
«Հայաստանի և Ադրբեջանի նախագահների հանդիպումից հետո արտգործնախարարները լրագրողների հետ հանդիպման ժամանակ հայտնեցին, որ բանակցություններն ընթացել են կառուցողական մթնոլորտում, և ձեռք է բերվել որոշակի առաջընթաց։ Նախարարները նաև հայտարարել են մոտ ժամանակներս երկու պետությունների ղեկավարների նոր հանդիպման հնարավորության մասին, իսկ հանդիպումից ընդհանուր տպավորությունը կրում է դրական բնույթ», - հինգշաբթի մամուլի ասուլիսի ժամանակ ասաց Նալբանդյանը։
Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հանդիպումը, որը նվիրված էր ղարաբաղյան հակամարտության կարգավորմանը, տեղի է ունեցել հունիսի 4-ին՝ Սանկտ Պետերբուրգում անցակցվող տնտեսական միջազգային համաժողովի շրջանակներում։ Այնուհետև ադրբեջանական կողմը հայտարարել է, որ հանդիպումը չի կրել կառուցողական բնույթ՝ իբրև թե հայկական կողմի մեղքով։
«Այդ պատճառով զարմանալի է, երբ Ադրբեջանի նախագահին մոտ կանգնած շրջանակը նման հայտարարություններ է անում։ Տպավորություն է ստեղծվում, որ աջ ձեռքը չգիտի, թե ինչ է անում ձախը, կամ նախագահի մոտ շրջանակում լուրջ տարաձայնություններ կան», - ասաց նա։
Նախարարի խոսքերով՝ ղարաբաղյան հակամարտության կարգավորման բանակցային գործընթացում ներգրավված անձինք խորհուրդ են տալիս հայկական կողմին՝ ուշադրություն չդարձնել նման հայտարարություններին, «քանի որ դրանք լուրջ չեն»։
Ինչպես ավելացրեց ՀՀ ԱԳ նախարարը՝ այդ տեսակետը ճիշտ է, քանի որ հաճախ ադրբեջանական կողմի հայտարարությունները լուրջ բնույթ չեն կրում։
«Սակայն այս գործընթացն օրինաչափություն է դառնում, և մտավախություն է առաջանում, որ Ադրբեջանն օգտագործում է բանակցությունները ոչ թե կոնկրետ արդյունքների հասնելու, այլ ուրիշ նպատակների համար», - նշեց Նալբանդյանը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
