Հայաստանի ֆուտբոլի երիտասարդական հավաքականի գլխավոր մարզիչ Ֆլեմինգ Սերիցլևը հիասթափված է Թուրքիայի երիտասարդական հավաքականի հետ իր սաների խաղի արդյունքներից։
Նախօրեին Հայաստանի երիտասարդական հավաքականը 2։5 հաշվով պարտվել է Թուրքիայի հավաքականին։
«Ես շատ հիասթափված եմ խաղի արդյունքներից։ Որևէ կասկած չկա, որ Թուրքիան արժանի էր հաղթանակի։ Այսօր մեր հավաքականը շատ թույլ էր, սակայն մյուս կողմից՝ ես բավարարված եմ մեր հարձակման մակարդակով», - ասել է Սերիցլևը խաղից հետո կազմակերպված մամուլի ասուլիսի ժամանակ։
Նրա խոսքերով՝ հանդիպման հատկապես առաջին կեսին հայ ֆուտբոլիստները պարզ իրավիճակներում հաճախ կորցնում էին գնդակը կամ շատ երկար էին պահում այն դաշտի կենտրոնում, «սակայն խաղի վերջում ցույց տվեցին, որ կարող են լավ հարձակվել»։
Մարզիչը նաև նշել է այն փաստը, որ իր սաները չէին հանձնվում նույնիսկ 0։4 հաշվի դեպքում և պայքարում էին մինչև հանդիպման ավարտը։
Թուրքիայի հավաքականի գլխավոր մարզիչ Համի Մանդիրալին իր հերթին շնորհակալություն է հայտնել Հայաստանի ֆուտբոլի ֆեդերացիային ջերմ ընդունելության համար։
«Այսօր երկու լավ թիմերի խաղ էր, մենք կարողացանք հաղթել, և ես շատ գոհ եմ և երջանիկ», - ասել է Մանդիրալին։
Նա ասել է, որ խաղը հիանալի էր՝ միաժամանակ ափսոսանք հայտնելով, որ խաղին ներկա չէին թուրք երկրպագուները։ Մանդիրալին, ընդհանուր առմամբ, գոհ էր հայ երկրպագուներից։
«Կցանկանայի, որպեսզի Թուրքիայի օրհներգի ժամանակ նրանք չսուլեին և երկրապագեն իրենց թիմին, այլ ոչ թե մրցակցի թիմի դեմ», - նշել է Թուրքիայի հավաքականի մարզիչը։
Հայաստանի հավաքականը միևնույն խմբում է Թուրքիայի, Շվեյցարիայի, Իռլանդիայի, Վրաստանի և Էստոնիայի հավաքականների հետ։ Երկու փուլերից հետո խմբի առաջատարն է 6 միավոր հավաքած Թուրքիայի հավաքականը։ Հայաստանի հավաքականը երկու պարտությամբ եզրափակում է առաջնության աղյուսակը։--0--
