Հայաստանի Հանրային խորհուրդը համաներում հայտարարելու մասին նախագիծ է մշակում՝ հանրապետության նախագահին ներկայացնելու համար
ՀՀ Հանրային խորհուրդը դիմումի նախագիծ է մշակում՝ ուղղված հանրապետության նախագահին՝ խնդրելով համաներում հայտարարելու նախաձեռնությամբ դիմել ԱԺ։
Խորհրդի նախագահ Վազգեն Մանուկյանի խոսքերով՝ հանձնաժողովներում նախնական քննարկումների ընթացքում ընդունվել է որոշման նախագիծ, որում ասվում է, որ համաներումը՝ որպես մարդասիրական գործողություն, կարող է նպաստել հայկական հասարակությունում հանդուրժողականության մթնոլորտի ձևավորմանը։
Նախագծի հեղինակներից մեկի՝ իրավաբան Արմեն Տեր-Տաճատյանի խոսքով՝ դիմումի նախագիծը կազմված է երկու կետից. համաներման նախաձեռնությամբ հանդես գալու առաջարկ և այն կատեգորիայի անձանց ցուցակ, որոնց նկատմամբ առաջարկվում համաներում հայտարարել։
Նա հայտնեց, որ նախագծում հիշատակվում է կապը առաջարկվող համաներման և 2008 թ.-ի մարտի 1-ի դեպքերի միջև՝ նշելով, որ «ճիշտ չէ լռել այդ կապի մասին»։
«Հասարակությունը համաներման հարցը դիտարկում է հենց մարտի 1-ի դեպքերի արդյունքում դատապարտվածների հարցի համատեքստում։ Եվ Հանրային խորհուրդը, արտացոլելով հասարակական կարծիքը, իրավունք չունի չխոսել այդ կապի մասին»,- ընդգծեց Տեր-Տաճատյանը։
Իր հերթին Խորհրդի անդամ, ԽՍՀՄ ժողովրդական արտիստ Սոս Սարգսյանը նշեց, որ պետք չէ ընդգծել համաներման կապը մարտի 1-ի դեպքերի հետ։
«Բոլոր մարդիկ հավասար են օրենքի առաջ, և անարդար է առանձնացնել որոշ դատապարտվածներին մյուսներից»,- ասաց նա։
Մայիսի 28-ին նախագահը պատրաստակամություն հայտնեց օգտվել համաներում շնորհելու իր սահմանադրական իրավունքից։Նախագահի խոսքերով՝ վերջին համաներումը հայտարարվել է 2006 թվականին, և եթե երեք տարվա ընթացքում երկրում հասունացել է նոր համաներում կրրառելու գաղափարն, ապա ինքը պատրաստ է օգտվել իր սահմանադրական իրավունքից։
Նախագահն առաջարկել է բոլոր քաղաքական ուժերին և հասարակական գործիչներին, մասնավորապես, Հանրային խորհրդին, նախագահի նստավայր ներկայացնել իրենց առաջարկությունները համաներման անցկացման անհրաժեշտության և կարգի վերաբերյալ։ Նախագահը նշել է, որ եթե պարզվի, որ իսկապես համաներում հայտարարելու անհրաժեշտություն կա, ապա ինքն անմիջականորեն այդ հարցով կդիմի խորհրդարան։
Ավելի վաղ ՀՀ խորհրդարանի խոսնակ Հովիկ Աբրահամյանը չէր բացառել նախագահի կողմից մարտի 1-ի զանգվածային անկարգությունների գործով ձերբակալվածների նկատմամբ համաներում հայտարարելու հնարավորությունը։
2008թ. փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվեցին անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվեց տասը քաղաքացի և վիրավորվեց 265-ը։-0-
