ԱՄՆ-ն զերծ է մնում մեկնաբանություններից Երևանի Ավագանու խորհրդի ընտրությունների վերաբերյալ. ԱՄՆ դեսպան
ԵՐԵՎԱՆ, 9 հունիսի. /Նովոստի-Արմենիա/. ԱՄՆ-ն զերծ է մնում մեկնաբանություններից Երևանի Ավագանու խորհրդի ընտրությունների վերաբերյալ, թեև գրանցել է խախտումների և կեղծումների դեպքեր, երեքշաբթի լրագրողներին ասաց Հայաստանում ԱՄՆ դեսպան Մարի Յովանովիչը։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։ ԿԸՀ վերջնական տվյալների համաձայն՝ Ավագանու խորհրդում ընդգրկվել են Հայաստանի հանրապետական կուսակցությունը, «Բարգավաճ Հայաստան» կոալիցիոն կուսակցությունը և ընդդիմադիր Հայ ազգային կոնգրեսը։ ՀՀԿ համամասնական ցուցակի առաջին հորիզոնականը զբաղեցնող Գագիկ Բեգլարյանը դարձավ Երևանի առաջին ընտրված քաղաքապետը: Միաժամանակ ընդդիմության ներկայացուցիչները հրաժարվեցին իրենց մանդատներից։
«Ընտրությունների օրը դեսպանատան դիտորդները հետևել են քվեարկության գործընթացին ընտրատեղամասերում և փողոցներում։ Մենք հանդիպել ենք խախտումների, կեղծումների, վախեցնելու դեպքերի ինչպես քվեարկության, այնպես էլ ձայների հաշվարկման ժամանակ»,- ասաց Յովանովիչը։
Ինչպես նշել է դեսպանը, ավելի ուշ ԱՄՆ-ն հանդես կգա ավելի բազմակողմանի հայտարարությամբ։
Իր հերթին ԱՄՆ պետքարտուղարի՝ Եվրոպայի և Եվրասիայի հարցերով տեղակալ Ֆիլիպ Գորդոնը դրական գնահատեց Երևանի Ավանգանու խորհրդի քվեարկության անցկացման ու ընտրությունների գործընթացը։
«Ընտրությունների արդյունքներն ամփոփվել են ընդամենը 2 օր առաջ, և մենք առայժմ ոչ մի պաշտոնական հայտարարություն տվյալ առնչությամբ չենք արել, սակայն ես լսել եմ, որ եղել են խախտումներ ու գրանցվել են խնդիրներ։ Մենք տեղյակ ենք նաև, որ ընտրվել են նաև ընդդիմության ներկայացուցիչները, որոնք հրաժարվել են իրենց մանդատներից։ Սակայն այս հարցի շուրջ ավելին մենք կասենք, երբ պատրաստ լինենք»,- ասաց Գորդոնը։ -0-
