Հայաստանի և Թուրքիայի հարաբերությունները պետք է կարգավորվեն առանց նախապայմանների և խելամիտ ժամկետում. պետքարտուղարություն

Հայաստանի և Թուրքիայի միջև հարաբերությունները պետք է կարգավորվեն առանց նախապայմանների և խելամիտ ժամկետներում, երեքշաբթի Երևանում լրագրողներին ասաց ԱՄՆ պետքարտուղարի՝ Եվրոպայի և Եվրասիայի հարցերով տեղակալ Ֆիլիպ Գորդոնը (Philip Gordon)։

«Հայաստանի և Թուրքիայի նախագահների հանդիպումից հետո ԱՄՆ-ն հանդես եկավ հայտարարությամբ այն մասին, որ Հայաստանի և Թուրքիայի միջև հարաբերությունները պետք է կարգավորվեն առանց նախապայմանների և խելամիտ ժամկետներում, և այսօր ես դարձյալ ուզում եմ հաստատել, որ կողմերի միջև նախապայմաններ չպետք է լինեն, իսկ որոշումը պետք է ընդունել խելամիտ ժամկետներում»,- ասաց Գորդոնը։
 
Նրա խոսքերով՝ երկկողմ հարաբերությունների հաստատումն առանձին գործընթաց է, որն անհրաժեշտ է դիտարկել այլ հարցերից անկախ և որը ոչ մի կերպ չպետք է կապել այլ հարցի հետ երկրներից ոչ մեկում։  

«Հայաստանի և Թուրքիայի հարաբերությունների նորմալացումն օգտակար կլինի  երկու երկրների և ողջ տարածաշրջանի համար, և այդ գործընթացը շատ կարևոր է»,- ասաց Գորդոնը։  

Նրա խոսքերով՝ «խելամիտ ժամկետները ենթադրում են, որ գործընթացը չի կարող անվերջ շարունակվել»։ «Կողմերը դա հասկանում են և տվյալ ուղղությամբ ձեռնարկում որոշակի քայլեր»,- ասաց Գորդոնը։  

Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Առաջին քայլերը հարաբերություններում արվեցին 2008թ. սեպտեմբերի 6-ին, երբ Թուրքիայի նախագահ Աբդուլա Գյուլն առաջին անգամ  ՀՀ նախագահ Սերժ Սարգսյանի հրավերով այցելեց Երևան՝ 2010 թ. աշխարհի առաջնության ընտրական փուլի շրջանակներում երկու երկրների հավաքականների միջև ֆուտբոլային հանդիպումը դիտելու համար։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-