Կոալիցիայում ընդգրկված «Բարգավաճ Հայաստան» կուսակցությունը լիովին բավարարված չէ Երևանի Ավագանու խորհրդի ընտրությունների արդյունքներից, երեքշաբթի լրագրողներին հայտարարեց կուսակցության առաջնորդ, խորհրդարանի պատգամավոր Գագիկ Ծառուկյանը։
«Բարգավաճ Հայաստանը», անշուշտ, ամբողջապես բավարարված չէ ընտրությունների արդյունքներից, քանի որ կարող էին ավելի լավ արդյունքներ արձանագրվել։ Մեր սխալներն ուղղելու համար մենք ներկուսակցական աշխատանք կիրականացնենք, քանի որ այս արդյունքներում կա նաև մեր կուսակիցների մեղքի բաժինը»,- ասաց նա։
Երևանում մայիսի 31-ին անցկացվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։ ԿԸՀ վերջնական տվյալների համաձայն՝ Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 186 630 ձայն (46,1 տոկոս)։ 89 131 ձայնով երկրորդ տեղում է «Բարգավաճ Հայաստան» կոալիցիոն կուսակցությունը, 69 140 ձայնով երրորդ տեղում է ընդդիմադիր Հայ ազգային կոնգրեսը։
Ձայների հաշվարկի արդյունքների համաձայն, Հայաստանի մայրաքաղաքի քաղաքապետ է դարձել ՀՀԿ համամասնական ցուցակը գլխավորող Գագիկ Բեգլարյանը։
Կուսակցության առաջնորդը նշեց, որ «Բարգավաճ Հայաստանը» «հետևողական և օգտակար կլինի իր ընտրողներին և իր աշխատանքով կծառայի Երևանի բնակիչների օգտին»։
«Մենք պետք է իրագործենք մեր ծրագրերը և հետևողական կլինենք այս ուղղությամբ։ «Բարգավաճ Հայաստանը» գոհ է ժողովրդի ցուցաբերած վստահությունից, քանի որ միայն մենք ենք պայքարել բոլոր պետական լծակների դեմ։ Ամենակարևորը, որ ժողովուրդը հավատ ու վստահություն ունի մեր նկատմամբ, և մենք պետք է աշխատենք, որպեսզի արդարացնենք այդ վստահությունը»,- ասաց Ծառուկյանը։ -0-
