ԵՐԵՎԱՆ, 8 հունիսի. /Նովոստի-Արմենիա/. ՀՀ Գիտությունների ազգային ակադեմիայի շենքում երկուշաբթի տեղի ունեցավ ռուս հայտնի տնտեսագետ, ՌԳԱ ակադեմիկոս Աբել Աղանբեկյանի՝ «Ճգնաժամ. դժբախտություն և հնարավորություն Ռուսաստանի համար» վերնագրով գրքի շնորհանդեսը։
«Գիրքը նվիրված է ճգնաժամի դրական ու բացասական հետևանքներին։ Այնտեղ ակադեմիկոսը կարծիք է հայտնում այն մասին, որ ճգնաժամը նաև հնարավորություն է տալիս հաղթահարելու այնպիսի խնդիրներ, որոնք, սկսած Խորհրդային միության փլուզումից, կուտակվել են Ռուսաստանում»,- լրագրողներին ասաց «Կորպորատիվ կառավարման բարձրագույն դպրոցի» գլխավոր տնօրեն Դավիթ Հախվերդյանը։
Նրա խոսքով՝ գիրքը զգալի նշանակություն ունի ՀՀ տնտեսության համար, քանի որ իրավիճակը երկու երկրներում մի շարք նշաններով նույնն է։
«Չնայած տարածքների ու ռեսուրսային բազաների տարբերությանը՝ ինստիտուցիոնալ առումով մեր երկրի տնտեսությունը շատ մոտ է Ռուսաստանի տնտեսությանը։ Ունենալով լուրջ գործնական կողմ՝ գիրքը կարող է ծառայել նաև հայկական իրականությանը»,- ընդգծեց Հախվերդյանը։
Նա նշեց, որ գիրքը կարող է օգտակար լինել ինչպես պետության ղեկավարող կառույցներին համապատասխան որոշումներ կայացնելու համար, այնպես էլ պրոֆեսիոնալ տնտեսագետներին։ --0--
