ՀՀ առողջապահության նախարարությունը ծրագրում է ֆիքսված գներ հաստատել ավելի քան 150 անուն դեղորայքի համար, չորեքշաբթի տեղեկացրեց ՀՀ առողջապահության նախարար Հարություն Քուշկյանը խորհրդարանում կայացած 2008 թ.-ի պետբյուջեի կատարման մասին հաշվետվության ընթացքում։
Նրա խոսքերով՝ ծրագրվում է հաստատել է առավել անհրաժեշտ դեղամիջոցների ցանկը՝ մոտ 150 անուն, որոնք անհետաձգելի դեպքերի ժամանակ առավել մեծ պահանջարկ ունեն Հայաստանում։
Նա նշեց, որ ՀՀ առողջապահության նախարարությունը ծրագրում է օրենսդրական առաջարկով դիմել խորհրդարան, որպեսզի ամրագրվի այդ դեղամիջոցների սահմանված ֆիքսված արժեքը։
«Առաջարկի օրենսդրական ամրագրումից հետո այդ դեղամիջոցների արժեքը շուկայում չպետք է գերազանցի ֆիքսված գինը», - ասաց Քուշկյանը։
Նա նաև տեղեկացրեց, որ հաշվի առնելով ճգնաժամն ու դեղորայքի գների աճը՝ 2009 թ.-ին նախարարությունն ակտիվ աշխատանքներ է տանում դեղագործական ընկերությունների հետ՝ հնարավոր առավելագույն ցածր գնով որոշ դեղամիջոցների ներկրման ուղղությամբ՝ չվնասելով դեղորայքի որակն ու բիզնեսը։
«Բանակցություններ են տարվել հիմնական դեղագործական ընկերությունների հետ, և մենք փորձել ենք պայմանավորվածություն ձեռք բերել առավելագույն հնարավոր մատչելի գներով դեպի Հայաստան դեղամիջոցների ներկրման կազմակերպման մասին», - ասաց Քուշկյանը։
Նախարարը նաև կարևորեց որոշ կազմակերպությունների կողմից դեղորայքի տեսքով լուրջ հումանիտար օգնության ստացումը՝ հիշեցնելով, որ 2008 թ.-ին երկու դեղագործական ընկերություններ որպես բարեգործական ակցիա արդեն Հայաստան են ներկրել 400 միլիոն դրամ (ավելի քան 1 միլիոն դոլար) ընդհանուր գումարի ինսուլին, ինչը թույլ կտա շուկայում զգալիորեն նվազեցնել այդ դեղորայքի գինը։
Միաժամանակ նա ընդգծեց, որ երկիր են ներկրվել ամենաորակյալ ինսուլինը հատուկ համակարգով, որը թույլ է տալիս կրճատել հիվանդի կախվածությունն այդ դեղամիջոցից։-0-
