Սիրիայի վարչապետը հրավիրել է իր հայ գործընկերոջն այցելել իր երկիր

ՀՀ վարչապետ Տիգրան Սարգսյանը երեքշաբթի հրավեր է ստացել այցելել Սիրիա, տեղեկացնում է ՀՀ կառավարության մամուլի ծառայությունը։

Սիրիական կառավարության ղեկավար Նաջի Օթրիի հրավերը Տիգրան Սարգսյանին է փոխանցել Սիրիայի արտգործնախարար Ուալիդ Ալմուալեմը։

Իր կողմից հայ վարչապետն իր ողջույնն է փոխանցել Սիրիայի Արաբական Հանրապետության վարչապետ Նաջի Օտրիին և շնորհակալություն հայտնել հրավերի համար։

Տիգրան Սարգսյանը նշել է, որ պատմամշակութային ընդհանրությունները և դարավոր բարեկամությունը ամուր հիմք են Հայաստանի և Սիրիայի ժողովուրդների միջև առկա ջերմ հարաբերությունների համար։  

Զրույցի ընթացքում ընդգծվել են Առևտրաարդյունաբերական պալատների միջև շփումների ակտիվացումը` առևտրատնտեսական հարաբերությունների զարգացման ուղղությամբ, տարածաշրջանային համատեղ ծրագրերի իրականացումը, երկու երկրների բանկային ոլորտում մասնագիտական փորձի փոխանակումն ու ներդրումների խրախուսումը, ինչպես նաև գործարարների երկկողմ շփումների, բիզնես ֆորումների կազմակերպման անհրաժեշտությունը։

Սիրիայի Արաբական Հանրապետության արտաքին գործերի նախարարը  կարևորեց Սիրիայի նախագահ Բաշշար ալ-Ասադի առաջիկա այցը Հայաստան և երկրում Սիրիայի մշակույթի օրերի անցկացումը։

Մուալեմը վարչապետի հետ քննարկել է նաև երկու երկրների միջև տարբեր բնագավառներում համագործակցության զարգացման հնարավորությունները։--0—