ՀՀ ԱԳ նախարար Էդվարդ Նալբանդյանը վտանգավոր է համարում ղարաբաղյան խնդրին կրոնական բնույթ հաղորդելու և Իսլամական կոնֆերանս կազմակերպության անդամ-պետությունների կրոնական զգացմունքների վրա շահարկելու Ադրբեջանի փորձերը։
Այս մասին Նալբանդյանն ասաց երեքշաբթի Երևանում իր սիրիացի գործընկեր Վալիդ Մուալեմի հետ մամուլի ասուլիսի ընթացքում՝ մեկնաբանելով մայիսի վերջին Դամասկոսում կայացած Կազմակերպության ԱԳ նախարարների 36-րդ կոնֆերանսի ժամանակ Ադրբեջանի նախաձեռնությամբ հակահայկական բանաձևի ընդունումը։
«Ղարաբաղյան խնդրին կրոնական բնույթ հաղորդելու վտանգավոր փորձերը հանգեցրեցին այդ փաստաթղթերի ընդունման, որոնք չեն կարող աջակցել ղարաբաղյան խնդրի լուծմանն ու տարածաշրջանում կայունության և անվտանգության ամրապնդմանը և ակնհայտ վնաս են հասցնում ընթացող բանակցություններին», - ասաց Նալբանդյանը։
Նրա խոսքերով, այդ փաստաթղթերը ընդունվել են խեղաթյուրված տեղեկատվության հիման վրա։ «Այդ փաստաթղթերը խեղաթյուրում են խնդրի և ընթացող բանակցությունների էությունը», - ընդգծեց նախարարը։
Ըստ Նալբանդյանի, հայ ժողովուրդը համերաշխության և փոխադարձ հարգանքի մթնոլորտում մահմեդական ժողովուրդների հետ համատեղ բնակվելու բազմադարյա ավանդույթ ունի։
«Այս ամենի լավագույն օրինակներից է Հայաստանի հարաբերությունները Սիրիայի և սիրիացի ժողովրդի հետ», - նշեց Նալբանդյանը։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
