Աշխարհագրություն, կենսանաբանություն և ընդհանուր պատմություն առարկաների՝ այս տարվա առաջին պետական քննությունները մեկնարկել են երեքշաբթի, Հայաստանի 17 քննական կենտրոնում։
«Կրթական համակարգը կատարելագործվում է ամեն տարի։ Մեզ համար համար թիվ մեկ խնդիրը մարդկային գործոնը նվազագույնի հասցնելն է։ ՀՀ նախագահ Սերժ Սարգսյանի մոտ տեղի ունեցած խորհրդակցության ժամանակ խնդիր է դրվել գնահատել քննությունների ընթացքն ու եզրակացությունների հիման վրա հաջորդ տարի կատարելագործել համակարգը», - ՄՊՔ-ի մեկնարկից առաջ լրագրողներին ասաց ՀՀ կրթության և գիտության նախարար Արմեն Աշոտյանը։
Գնահատման և թեստավորման կենտրոնի տվյալների համաձայն, հայկական դպրոցների 408 շրջանավարտ այսօր քննություն է հանձնում աշխարհագրություն առարկայից, 541-ը՝ ընդհանուր պատմություն առարկայից և 1811-ը՝ կենսաբանություն առարկայից։
Նախարարը նշեց, որ ՀՀ կրթության և գիտության նախարարության նպատակը քննական գործընթացի օբյեկտիվության, անկեղծության և թափանցիկության, ինչպես նաև տեղեկատվության նկատմամբ ազատ հասանելիության ապահովումն է։
Աշոտյանը տեղեկացրեց, որ ամենաշատ հայտերն այս տարի կլինեն Խ. Աբովյանի անվան պետական մանկավարժական համալսարանում։
«Բարձր մրցույթ կլինի նաև Երևանի Բրյուսովի անվան լեզվաբանական համալսարանում և Երևանի պետական համալսարանում», - նշեց նա։
Նախարարի խոսքերով, անհրաժեշտ է մեծ ուշադրություն դարձնել բարձրագույն կրթության որակի վրա, քանի որ հենց բարձրորակ մասնագետների վրա է հիմնված գիտատար տնտեսության ապագան։
ՀՀ գնահատման և թեստավորման կենտրոնի տվյալներով, դիմորդների մեծ մասը (12 545) քննության հայտ է ներկայացրել «Հայոց լեզու և գրականություն» առարկայից, երկրորդ տեղում է մաթեմատիկան (9 804), իսկ երրորդ տեղում՝ անգլերեն լեզուն (8 212)։
Միասնական պետական քննություն հանձնել ցանկացողների մեծ մասը բնակվում է ՀՀ մայրաքաղաքում (6 644)։ Երկրորդ տեղում են Շիրակի մարզի դիմորդները (1 783), իսկ երրորդ տեղում՝ Լոռու մարզի բնակիչները (1 624)։
Հայաստանում առաջին անգամ ՄՊՔ անցկացվել է 2007 թվականի հունիսի 1-ին «Հայոց լեզու և գրականություն» առարկայից՝ Հայաստանի և Լեռնային Ղարաբաղի 1442 քննական կենտրոնում։
Ընդամենը մասնակցել է ավելի քան 50 հազար մարդ, ընդ որում մոտ 38 հազարը ավարտական քննություն է հանձնել «Ա» տարբերակով, իսկ մնացածը լուծել են թեստային «Բ» տարբերակը, որը բաղկացած էր բուհերի ընդունելության հարցերից։ -0-
