ԿԸՀ վերջին տվյալների համաձայն՝ Հայաստանի հանրապետական կուսակցությունը Երևանի Ավագանու խորհրդի ընտրություններում ավելի քան 190 հազ. ձայն է հավաքել

Կենտրոնական ընտրական հանձնաժողովի վերջին տվյալների համաձայն՝ Հայաստանի հանրապետական կուսակցությունը Երևանի Ավագանու խորհրդի ընտրություններում հավաքել է 190171 ձայն։ 91141 ձայնով երկրորդ տեղում է «Բարգավաճ Հայաստան» կոալիցիոն կուսակցությունը, իսկ երրորդ տեղում է 69871 ձայն հավաքած ընդդիմադիր Հայ ազգային կոնգրեսը։

Նրանց հաջորդում է ևս մեկ կոալիցիոն կուսակցություն՝ «Օրինաց երկիրը» (20959), Հայ հեղափոխական դաշնակցությունը (18648), Ժողովրդական կուսակցությունը (8569) և Հայաստանի աշխատավորական սոցիալիստական կուսակցությունը (1951)։

Երևանում մայիսի 31-ին ավարտվեցին Ավագանու խորհրդի առաջին ընտրությունները։ Խորհուրդը կազմված է լինելու 65 անդամից։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ավագանու խորհրդում կզբացեղնի տեղերի  մեծամասնությունը:

Երևանի Ավագանու խորհրդի ընտրություններն անցկացվում են համամասնական ընտրակարգով:

Էլեկտրոնային տարբերակով ԿԸՀ-ից ստացված նախնական տվյալների համաձայն՝ ձայնի իրավունք ունեցող 771 477 քաղաքացուց ընտրություններին մասնակցել է 407745 մարդ կամ ընտրողների 52,85 տոկոսը։-0-