ԵԱՀԿ Մինսկի խմբի (ՄԽ) համանախագահները, որոնք ներկայացնում են ԱՄՆ-ն, Ռուսաստանն ու Ֆրանսիան, ուրբաթ երեկոյան կժամանեն Հայաստան, «Նովոստի-Արմենիա» գործակալությանը տեղեկացրեց ՀՀ ԱԳՆ ԶԼՄ-ների հետ կապի բաժնի ղեկավար Տիգրան Բալայանը։
«Երկրի բարձրագույն ղեկավարության հետ միջնորդների հանդիպումները վաղն են ծրագրված», - տեղեկացրեց Բալայանը։
ԵԱՀԿ ՄԽ համանախագահների այցը տարածաշրջան սկսվել է ուրբաթ Ադրբեջանից։ Այցի հիմնական նպատակը Հայաստանի և Ադրբեջանի նախագահներ Սերժ Սարգսյանի և Իլհամ Ալիևի հերթական հանդիպումը նախապատրաստելն է, որը տեղի կունենա հունիսին՝ Սանկտ Պետերբուրգում կայանալիք տնտեսական համաժողովի շրջանակներում։
Հայաստանի և Ադրբեջանի նախագահների նախորդ հանդիպումը կայացել էր մայիսի 7-ին Պրահայում։ Լեռնային Ղարաբաղի հակամարտության կարգավորման ԵԱՀԿ ՄԽ համանախագահներ Յուրի Մերզլյակովը (Ռուսաստան), Մեթյու Բրայզան (ԱՄՆ) և Բեռնար Ֆասյեն (Ֆրանսիա) կարծում են, որ Հայաստանի և Ադրբեջանի նախագահներ Սերժ Սարգսյանի ու Իլհամ Ալիևի հանդիպումները թույլ կտան մինչև տարեվերջ կոնկրետ տեղաշարժերի հասնել ղարաբաղյան հակամարտության կարգավորման հիմնարար սկզբունքների շուրջ։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։
1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։
1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-
