ԵՐԵՎԱՆ, 28 մայիսի. /Նովոստի-Արմենիա/. Երևանի բնակիչների 25 տոկոսն անտարբեր է Երևանի ավագանու խորհրդի առաջիկա ընտրությունների նկատմամբ, լրագրողներին հինգշաբթի հայտնեց անկախ սոցիոլոգիական «Սոցիոմետր» կենտրոնի տնօրեն Ահարոն Ադիբեկյանը։
ԿԸՀ տվյալներով՝ ընտրություններին կմասնակցեն «Բարգավաճ Հայաստան», Հայաստանի Հանրապետական կուսակցությունները, «Օրինաց երկիր», Դաշնակցություն կուսակցութունները, Ժողովրդական կուսակցությունը, Հայաստանի Աշխատավորական սոցիալիստական կուսակցությունն ու Հայ ազգային կոնգրեսի նախընտրական դաշինքը։
Ադիբեկյանի խոսքերով՝ ևս 4 տոկոսը գիտակցաբար կբոյկոտեն ընտրությունները։
Ըստ նրա՝ հարցվածների 29 տոկոսը գնալու է ընտրությունների և չի թաքցնում, թե ում կտա իր ձայնը, մինչդեռ հարցվածների 17 տոկոսը մասնակցելու է ընտրությունների, բայց չի կամենում նշել իր թեկնածուների անունը։
Ադիբեկյանը նշեց նաև, որ 22 տոկոսը դեռևս չի կողմնորոշվել՝ գնալու՞ է ընտրությունների, թե՞՝ ոչ, իսկ 3 տոկոսը չի կողմնորոշվել քվեարկության հարցում, թեև չեն թաքցնում, թե ում կցանկանային տալ իրենց ձայնը։ Սոցհարցումն անցկացվել է ապրիլ-մայիս ամիսներին Երևանի համայնքներում, հարցմանը մասնակցել է 5500 մարդ։
Ադիբեկյանի գնահատականներով, անճշտությունը չի գերազանցում 3 տոկոսը։ Նախատեսվում է Երևանում ստեղծել 65 անդամներից բաղկացած և համամասնական ընտրակարգով ձևավորվող Ավագանու խորհուրդ։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի ձայների մեծամասնությունը: --0—
