ՀՀ նախագահ Սերժ Սարգսյանը դրական է գնահատում նախընտրական գործընթացը և քաղաքական ուժերին հավելյալ լարվածություն չստեղծելու կոչ է անում:
«Գործընթացը նորմալ ու դրական եմ գնահատում: Բոլոր կուսակցությունները Երևանի բնակիչներին սեփական ծրագրերը ներկայացնելու հավասար հնարավորություն են ունեցել»,- լրագրողներին ասաց նախագահը Սարդարապատում, որտեղ նա մասնակցում էր Առաջին հանրապետության օրվա կապակցությամբ կազմակերպված միջոցառումներին:
Երկրի ղեկավարի խոսքով, հեռուսատաընկերություններն անկողմնակալ են եղել նախընտրական քարոզարշավը լուսաբանելու հարցում: «Ես ուրախ եմ, որ քաղաքական ուժերը նախընտրական տարաբնույթ տեխնոլոգիաներ ու հնարքներ են կիրառել՝ սկսած հավաքներից ու երթերից, ավարտած ընտրողների տներ կատարած այցերով»,- ասաց նախագահը:
«Իմ կոչն է, իմ ուղերձը, իմ խնդրանքը քաղաքական ուժերին՝ չստեղծել հավելյալ լարվածություն: Որպեսզի նրանք շարունակեն նույն ոգով, մի քանի օրվա ընթացքում ավարտեն նախընտրական գործունեությունը և մայիսի 31-ին լավ ընտրություններ անցկացնեն, որոնք հիմք դառնան, որ մեր ժողովուրդն ու միջազգային կազմակերպությունները կարողանան ասել, որ դրանք ամենալավն են եղել Հայաստանում»,- նշեց երկրի ղեկավարը:
Մայիսի 31-ին տեղի կունենան Երևանի Ավագանու խորհրդի ընտրությունները: «Երևանում տեղական ինքնակառավարման մասին» նոր օրենքի համաձայն նախատեսվում է Երևանում ստեղծել 65 անդամից բաղկացած և համամասնական ընտրակարգով ձևավորվող Ավագանու խորհուրդ։
Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի 50%՝ գումարած մեկ ձայն: -0-
