Հայաստանի հետ հարաբերություններ բարելավելու թուրքական ցանկությունը պայմանավորված էր ԵՄ-ին անդամակցելու ձգտումով. ՀԴԿ ղեկավար
Հայաստանի հետ հարաբերությունները բարելավելու Թուրքիայի ցանկությունը պայմանավորված էր ԵՄ-ին անդամակցելու ձգտումով, կարծում է Հայաստանի դեմոկրատական կուսակցության ղեկավար Արամ Սարգսյանը։
«Թուրքիան Հայաստանի հետ հարաբերությունների բարելավման գործընթաց սկսեց, որպեսզի թուլացնի ԵՄ ճնշումը, և հասնի Եվրոպական Միության անդմակցությանը»,- երեքշաբթի լրագրողներին հայտնեց Սարգսյանը։
Նա հավելեց, որ ԵՄ-ին անդամակցելը, մասնավորապես, Շենգենյան գոտի մուտք գործելը, պետք է Թուրքիային ոչ թե զբոսաշրջային նպատակների համար, այլ այդ երկրներում ընդլայնվելու և արաբներին, չինացիներին ու հնդիկներին զուգահեռ ժողովրդագրական այն փոփոխություններին մասնակցելու համար, որոնք ներկայում տեղի են ունենում Եվրոպայում, ինչը, նրա կարծիքով, Թուրքիայի «պանթուրքական» քաղաքականության շարունակությունն է։
ՀԴԿ ղեկավարը նշեց, որ այդ կապակցությամբ շատ կցկտուր հնչեցին Ֆրանսիայի նախագահ Նիկոլյա Սարկոզիի և ԳՖՀ կանցլեր Անգելա Մերկելի հայտարարությունները, ովքեր հայտնեցին, որ եթե նույնիսկ Թուրքիան կատարի Եվրամիության բոլոր պահանջները, նրան, միևնույն է, չեն ընդունի ԵՄ։
ՀԴԿ առաջնորդը կարծում է, որ հատկապես այն, որ թուրքական իշխանությունները գիտակցեցին փաստը, որ եվրոպացիները ոչ մի դեպքում թույլ չեն տա Թուրքիային անդամակցել Եվրամիությանը, հանգեցրեց Հայաստանի նկատմամբ նրանց քաղաքականության փոփոխությանը և հարաբերությունների բարելավումից հրաժարվելուն։
Ըստ նրա, հենց այդ պատճառով Թուրքիայի վարչապետ Ռեջեփ Թայիփ Էրդողանը հայտարարեց, որ հայ-թուրքական հարաբերությունների բարելավման նախապայման կդառնա ղարաբաղյան հակամարտության կարգավորումը։
Սարգսյանը նշեց, որ երբ 2008 թվականին սկսվեց «ֆուտբոլային դիվանագիտությունը» և երկու երկրների միջև հարաբերությունների բարելավման գործընթացը, Հայաստանում շատերին պատեց անհիմն լավատեսություն՝ Թուրքիայի հետ հարաբերությունների հնարավոր բարելավման վերաբերյալ, և այսօր թուրք ղեկավարների հայտարարությունից հետո նրանք իրենց խաբված են զգում։ «Թուրքիան մեզ չի խաբել, նրան պարզապես պետք էր մտնել ԵՄ կազմի մեջ»,- նշեց Սարգսյանը։
Նրա կարծիքով, ստեղծված իրավիճակում Հայաստանի քաղաքականությունը պետք է ավելի ակտիվ լինի, պետք է հանդես գա զանազան նախաձեռնություններով, օրինակ, ազատ տնտեսական գոտու ստեղծման, հայ-թուրքական սահմանում սպառազինման սահմանափակումների, համատեղ տարածաշրջանային բնապահպանական ծրագրերի իրականացման նախաձեռնություններով, և այդ ժամանակ Թուրքիան ստիպված կլինի պատճառաբանել համաշխարհային հանրության առջև Հայաստանի հետ համագործակցությունից հրաժարվելը։
Սարգսյանը նշեց նաև, որ չնայած որոշ բացերի, ՀՀ գործող նախագահ Սերժ Սարգսյանի արտաքին քաղաքականությունն ավելի ճկուն է, քան նրան նախորդող նախագահ Ռոբերտ Քոչարյանինը:
Թուրքիայի և Հայաստանի արտգործնախարարությունները, ինչպես նաև Շվեյցարիայի արտաքին գործերի դաշնային դեպարտամենտն ապրիլի 23-ի գիշերը հարաբերությունների կարգավորման համատեղ հայտարարություն են արել: Հայտարարության մեջ ասվում է, որ կողմերը համաձայնության են հանգել իրենց երկկողմ հարաբերությունների կարգավորման համապարփակ շրջանակի շուրջ երկու կողմերին գոհացնող կերպով: Այս համատեքստում սահմանվել է ճանապարհային քարտեզ:
Հայաստանի և Թուրքիայի միջև բացակայում են դիվանագիտական հարաբերությունները՝ Թուրքիայի առաջ քաշած նախապայմանների պատճառով։ Մասնավորապես, Թուրքիան Հայաստանից պահանջում է հրաժարվել հայոց Մեծ Եղեռնի միջազգային ճանաչման գործընթացից։
Հարաբերություններում առաջին տեղաշարժերը նկատվեցին 2008 թ.-ի սեպտեմբերի 6-ին, երբ Թուրքիայի նախագահ Աբդուլա Գյուլը ՀՀ նախագահ Սերժ Սարգսյանի հրավերով առաջին անգամ այցելեց Երևան՝ 2010 թ.-ի աշխարհի առաջնության ընտրական փուլի շրջանակներում Հայաստանի և Թուրքիայի հավաքականների միջև ֆուտբոլային հանդիպումը դիտելու նպատակով։ Այցի ընթացքում երկու պետությունների ղեկավարները քննարկեցին երկկողմ հարաբերությունների հաստատման հնարավորությունները։-0-
