Հայաստանում սղաճի ցուցանիշը լավագույնն է ԱՊՀ տարածքում. ԿԲ փոխնախագահ

ԵՐԵՎԱՆ, 25 մայիսի. /Նովոստի-Արմենիա/. Հայաստանում սղաճի ցուցանիշը լավագույնն է ԱՊՀ երկրների շրջանում, ասաց ՀՀ ԿԲ փոխնախագահ Վաչե Գաբրիելյանը։

«Այսօրվա դրությամբ տարեկան կտրվածքով սղաճը Հայաստանում 3,2 տոկոս է կազմում»,- երկուշաբթի ասաց նա՝ ելույթ ունենալով «Հայաստան. դիմակայելով համընդհանուր աղետին» միջազգային տնտեսական համաժողովի ժամանակ:

Ընդ որում, նա հավելեց, որ եթե համեմատենք ընթացիկ տարվա հունվար-ապրիլը անցյալ տարվա նույն ժամանակահատվածի հետ, ապա տվյալ ցուցանիշը 2,3 տոկոս է կազմում։

Ազգային վիճակագրական ծառայության տվյալներով, 2009 թ.-ի հունվար-ապրիլին 2008 թ.-ի դեկտեմբերի համեմատ հանրապետությունում գրանցվել է սպառողական գների աճ 3,9 տոկոսով։ Պետբյուջեի համաձայն, սղաճը Հայաստանում 2009 թ.-ին ծրագրված է 4 տոկոսի չափով (±1,5%)։

«Հայաստան. դիմակայելով համընդհանուր աղետին» միջազգային տնտեսական համաժողովի կազմակերպիչն է Policy Forum Armenia միջազգային կազմակերպությունը և կոչված է համաշխարհային ֆինանսատնտեսական ճգնաժամի հնարավոր փոխազդեցություններն ու հետևանքները քննարկելու համար։ Համաժողովին մասնակցում են Հայաստանի, Ռուսաստանի, Թուրքիայի, Ուկրաինայի և ԱՄԷ տնտեսական շրջանների բարձրաստիճան ներկայացուցիչներ։ -0-