Նախօրեին Երևանի «Նաիրիտ-2» քիմգործարանում տեղի ունեցած հրդեհի մասին ահազանգից հետո դեպքի վայր է մեկնել միանգամից վեց մարտական հաշվարկ

Նախօրեին Երևանի «Նաիրիտ-2» քիմգործարանում տեղի ունեցած հրդեհի մասին ահազանգից հետո դեպքի վայր է մեկնել միանգամից վեց մարտական հաշվարկ, ուրբաթ «Նովոստի-Արմենիա» գործակալությանը տեղեկացրեցին ՀՀ ԱԻՆ Փրկարար ծառայությունից։

«Մայիսի 21-ին, ժամը 18.08-ին «Նաիրիտ» ՓԲԸ-ի հրշեջ-փրկարար ջոկատից տեղեկություն է ստացվել այն մասին, որ հրդեհ է բռնկվել Երևանի Արտաշատի խճուղի 5/1 հասցեում գտնվող «Նաիրիտ-2» ՓԲԸ-ի տարածքում: Դեպքի վայր է մեկնել վեց մարտական հաշվարկ, ինչպես նաև փրկարար ուժերի վարչության օպերատիվ խումբը», - տեղեկացրեցին Փրկարար ծառայությունից։

Դեպքի մասին տեղյակ են պահվել ՀՀ առողջապահության նախարարության, ՀՀ ոստիկանության և Երևան քաղաքի «1-03» ծառայության հերթապահները:

«Հրդեհը մարվել է տեղի ուժերով: Հրշեջ-փրկարարների կողմից հրդեհի վայրում իրականացվել են հովացման աշխատանքներ», - ասվում է տեղեկատվության մեջ։

Փրկարարների տեղեկատվությամբ՝ պոլիէթիլենի արտադրամասում այրվել են պոլիէթիլենային իրեր` 36 քմ մակերեսով։

2001թ. «Նաիրիտ» ոչ կառավարական կազմակերպությունից առանձացվեցին քլորոպենային կաուչուկի արտադրության համար անհրաժեշտ ուժեր, որոնց հիման վրա ստեղծվեց պարտքերից ազատված ձեռնարկությունը՝ «Նաիրիտ-2» ՓԲԸ-ն: ՓԲԸ-ն զբաղվում է քիմիական տեխնոլոգիաների մշակմամբ, քիմիական նյութերի արտադրության նախագծերի ներդրմամբ, մետաղագործության ոլորտի հետազոտություններով:

Մայիսի 14-ին «Նաիրիտ-2» ՓԲԸ –ից ոչ հեռու գտնվող «Նաիրիտ» քիմգործարանում տեղի ունեցած պայթյունից առաջացած հրդեհի հետևանքով մահացել էր գործարանի չորս աշխատակից, ինչպես նաև վիրավորվել Փրկարար ծառայության 17 աշխատակից:-0-