Կստորագրեն ավիացիոն պատահարների հետաքննության ոլորտում համագործակցության մասին համաձայնագիրը
Անկախ Պետությունների Համագործակցության (ԱՊՀ) երկրների կառավարությունների ղեկավարներն ուրբաթ Աստանայում կստորագրեն ԱՊՀ մասնակից-պետությունների պետական օդանավերի մասնակցությամբ ավիացիոն պատահարների հետաքննության ոլորտում համագործակցության մասին համաձայնագիրը, «Նովոստի-Արմենիա» գործակալությանը տեղեկացրեցին ԱՊՀ գործադիր կոմիտեի մամուլի ծառայությունից։
Ինչպես հաղորդում է «Նովոստի-Արմենիա» գործակալության թղթակիցը Աստանայից, նախատեսվում է միասնական մոտեցում ապահովել ԱՊՀ պետություններից մեկի տարածքում մեկ այլ պետության պետական օդանավերի մասնակցությամբ ավիացիոն պատահարների հետաքննության կազմակերպման նկատմամբ՝ ԱՊՀ մասնակից-պետությունների պետական օդանավերի մասնակցությամբ ավիացիոն պատահարների հետաքննության կանոնների համաձայն, որոնք Համաձայնագրի անբաժանելի մասն են։
«Համաձայնագրի դրույթների իրագործման համար դրա ուժի մեջ մտնելուց հետո կողմերը կսահմանեն պետական ավիացիայի թռիչքների անվտանգության լիազոր մարմին, որի վրա կդրվի ավիացիոն պատահարների հետաքննության կազմակերպումը, դրանց դասակարգումն ու հաշվառումը, ինչպես նաև կողմերի պետական ավիացիայի ավիացիոն անձնակազմի գործունեության նկատմամբ պետական միջգերատեսչական վերահսկումը, որը վերաբերում է թռիչքի անվտանգությանը», - ասվում է տեղեկատվության մեջ։
Համաձայնագրի նախագծով նախատեսվում է համակարգված գործունեության իրականացում գիտական մշակումների անցկացման, տեխնիկական միջոցների և ավիացիոն պատահարների հետաքննության համալիր համակարգերի նախագծման, պատրաստման, ձեռքբերման և ներդրման դեպքում, այդ թվում նաև ավիացիոն պատահարների հետաքննության մեթոդների կատարելագործման ոլորտում համատեղ ծրագրի մշակման միջոցով՝ հաշվի առնելով Կողմերի պետությունների և պետական օդանավերից օգտվողներ այլ պետությունների զինված ուժերի շահերը։
Կառավարությունների ղեկավարների խորհրդի (ԿՂԽ) նիստի ընթացքում նախատեսվում է քննարկել 18 փաստաթղթի նախագծեր։
ՀՀ վարչապետ Տիգրան Սարգսյանի գլխավորած հայկական պատվիրակությունը երկօրյա աշխատանքային այցով Աստանա է ժամանել նախօրեին։-0-
