«Նաիրիտ» կաուչուկի ձեռնարկությունում տեղի ունեցած վթարը բնակչության համար վտանգավոր հետևանքների չի հանգեցրել. նախարար

Հայկական «Նաիրիտ» կաուչուկի ձեռնարկությունում տեղի ունեցած վթարը բնակչության համար վտանգավոր հետևանքների չի հանգեցրել։ Այս մասին նախօրեին խորհրդարանում տեղի ունեցած կառավարական ժամի ընթացքում հայտարարել է ՀՀ էներգետիկայի և բնական պաշարների նախարար Արմեն Մովսիսյանը։

Նրա խոսքերով՝ «Նաիրիտում» տեղի ունեցած վթարը խոշոր էր ոչ իր տեխնիկական մասշտաբներով, այլ հետևանքներով, քանի որ չորս զոհ գրանցվեց։

Նա նշել է, որ հրդեհի ընդհանուր մակերեսը կազմել է 80-90 քառակուսի մետր, ինչը լուրջ հետևանքների չէր կարող հանգեցնել։

«Հրդեհի հետևանքով վնասակար կամ թունավոր արտանետումներ, որոնք կարող էին վտանգավոր հետևանքներ ունենալ բնակչության համար, չեն գրանցվել», - ասել է Մովսիսյանը։

Տարածաշրջանի կաուչուկի խոշորագույն հսկա «Նաիրիտ» գործարանում պայթյունը  որոտացել էր մայիսի 14-ին, տեղական ժամանակով ժամը 18:00-ի սահմաններում՝ երկրորդ հերթափոխի աշխատանքը սկսելու պահին: Հրդեհի հետևանքով զոհվել է գործարանի չորս աշխատակից:

«Նաիրիտ» գիտաարտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ «Նաիրիտ» առևտրային անվանումով պոլիքլորոպրենը ձեռնարկությունն արտադրում է 1940 թվականից։ 1989թ.-ին «Նաիրիտը» փակվել էր՝ բնապահպանական նկատառումներով: Տարիների պարապուրդից հետո ձեռնարկության աշխատանքը մասնակիորեն վերսկսվել է 1992-93թթ.-ին:

2006 թ.-ից գործարանի 90 տոկոս բաժնետոմսերի տերը  բրիտանական Rhinoville Property Limited կոնսորցիումն է, մնացած 10 տոկոս բաժնետոմսերը պատկանում են ՀՀ կառավարությանը՝ ի դեմս Էներգետիկայի և բնական ռեսուրսների նախարարության։ 

Վիճակագրական տվյալներով՝ գործարանի միջին ամսական հզորությունը կազմում է 700-750 տոննա արտադրանք, սակայն իրական ամսական ծավալները տատանվում են 900-950-ից մինչև 500 տոննա քլորոպրենային կաուչուկ։ --0--