ՀՀ նախագահ Սերժ Սարգսյանը երեքշաբթի հրավիրել է Ազգային անվտանգության խորհրդի նիստ։ Խորհուրդը լսել է է Հայաստանում միջուկային նոր էներգաբլոկի կառուցման ծրագրի ներկա փուլի վերաբերյալ ՀՀ էներգետիկայի և բնական պաշարների նախարար Արմեն Մովսիսյանի զեկույցը։
Ինչպես չորեքշաբթի հաղորդում է ՀՀ նախագահի մամուլի ծառայությունը, խորհուրդը քննարկել է այդ ուղղությամբ մինչ օրս իրականացված քայլերն ու հավանություն տվել դրանց։
Ամրագելով Հայաստանի տնտեսության միջնաժամկետ ու երկարաժամկետ զարգացման, ինչպես նաև երկրի էներգետիկ անվտանգության ապահովման համատեքստում միջուկային նոր էներգաբլոկի կառուցման կարևորությունը` Անվտանգության խորհուրդը քննության է առել տեխնիկատնտեսական մշակումներից մինչև նոր էներգաբլոկի շահագործում ընկած գործընթացի իրականացման բոլոր փուլերը։
Ընկերության ընտրության մրցույթը, որն իր վրա կվերցնի Հայաստանում նոր ատոմային էներգաբլոսի կառուցման և մոնտաժի գործընթացի վերահսկումը, հաղթել է Worley Parsons միջազգային կոնսորցիումը։
Հայաստանը նախատեսում է ԱԷԿ նոր բլոկ կառուցել՝ մոտավորապես 1000 ՄՎտ հզորությամբ, և այս նախագիծը կարժենա մոտ 5 մլրդ. դոլար։ Այս նախագծի իրականացման համար արտասահմանյան կապիտալ ներգրավելու նպաատկով 2006թ. ՀՀ խորհրդարանն օրենսդրությամբ անվավեր ճանաչեց նոր ատոմային բլոկների պետական մենաշնորհի իրավունքը։Շինարարական աշխատանքները ծրագրվում է սկսել 2011 թ.-ի սկզբից։-0-
