Երևանի պետական համալսարանում տեղի ունեցավ անվանի հայ բարերարի հուշ-երեկոն
Երեքշաբթի Հայաստանի ազգային հերոսների օրերի շրջանակներում ԵՊՀ-ում տեղի ունեցավ անվանի հայ բարերար Ալեք Մանուկյանի հուշ-երեկոն։
Միջոցառման կազմակերպիչներն են Սփյուռքի նախարարությունն ու ԵՊՀ-ն։
«Վերջին մի քանի տասնամյակների ընթացքում՝ Խորհրդային միության տարիներին, «բարեգործություն» բառը դուրս էր մղված մեր առօրյայից։ «Բարեգործություն» հասկացությունն անհետացել էր մեր մտքից, բայց կարծում եմ, որ այն երբեք չի անհետացել մեր ժողովրդի սրտից»- միջոցառման ժամանակ ասաց ԵՊՀ ռեկտոր Արամ Սիմոնյանը։
Նրա խոսքերով՝ Ալեք Մանուկյանը, լինելով հայրենասեր, նաև մտածող էր, և նրա բարեգործությունն ուղղված էր կրթության, գիտության և մշակույթի զարգացմանը:
Իր հերթին ՀՀ սփյուռքի նախարար Հրանուշ Հակոբյանն ասաց, որ 2009 թ.-ը սփյուռքի նախարարությունը նվիրում է ազգային հերոս Ալեք Մանուկյանին, ինչպես նաև հայտնի գործիչներին։
«Կարծում եմ, որ ինչպես սփյուռքում, այնպես էլ Հայաստանում նման միջոցառումները շատ պետք է լինեն։ Նման միջոցառումները դաստիարակում են երիտասարդ սերնդին»,- ասաց Հակոբյանը։
Նրա խոսքերով՝ Ալեք Մանուկյանը ԱՄՆ ամենահայտնի հայերից մեկն է, որի հետ հաշվի էին նստում նաև ամերիկյան իշխանությունները, նա ամենուրեք թողել է իր հետքը։
Անվանի հայ գործարար ու մարդասեր Ալեք Մանուկյանը ծնվել է 1901 թ.-ին Զմյուռնիա (Իզմիր, Թուրքիա) քաղաքում։ 1953 թ.-ին ընտրվել է Հայ բարեգործական ընդհանուր միության (AGBU) միջազգային նախագահ ու զբաղեցրել այդ պաշտոնը ավելի քան 30 տարի։ 1989 թ.-ին նրան ընտրել են AGBU պատվավոր, ցմահ նախագահ, և նրա գործը շարունակել է դուստրը՝ Լուիզ Մանուկյանը։
Ալեք Մանուկյանը կանոնավոր կերպով ֆինանսավորել է հայկական ուսումնական ծրագրերը ԱՄՆ բազմաթիվ համալսարաններում։
Իր ողջ կյանքի ընթացքում Մանուկյանը շուրջ 90 մլն. ԱՄՆ դոլար է ներդրել բազմաթիվ բարեգործական, կրոնական, մշակութային ու կրթական կազմակերպություններում։
Բարեգործական գործունեության համար Մանուկյանին բազմաթիվ հայկական ու միջազգային մրցանակներ ու շքանշաններ են շնորհվել։ -0-
