Անվանի հայ ցեղասպանագետն ու թուրք գիտնականը 1915 թ.-ի Հայոց ցեղասպանության մասին նոր գիրք են ստեղծում
Ականավոր հայ ցեղասպանագետ, ակադեմիկոս Վահագն Դադրյանն ու թուրք գիտնական Թաներ Ակչամը աշխատանք են տանում 1915 թ.-ի Հայոց ցեղասպանության վերլուծությանը նվիրված նոր գրքի ուղղությամբ, այս մասին երեքշաբթի ԵՊՀ ուսանողների հետ հանդիպման ժամանակ հայտնեց Դադրյանը։
«Ցեղասպանությանը վերաբերող փաստաթղթերի վերլուծությանը նվիրված իմ աշխատանքներից մեկը վերջերս թարգմանվել է թուրքերեն Ստամբուլի պետական համալսարանում։ Դա ոգեշնչել է ինձ ու Թաներ Ակչամին, որը Ցեղասպանությունը ճանաչող ու դատապարտող փոքրաթիվ թուրք պատմաբաններից է, գրել իմ գրքի շարունակությունը»,- նշեց գիտնականը։
Նա ընդգծեց, որ հատկապես կարևոր է անցյալ դարի 20-ական թթ.-ին վերաբերող փաստաթղթերի ուսումնասիրությունը, այսինքն՝ Հայոց ցեղասպանությանը հաջորդած ժամանակահատվածի։
Դադրյանի խոսքերով՝ այդ ժամանակահատվածի փաստաթղթերի ուսումնասիրությունը թույլ կտա ապացուցել, որ թուրքական պետությունը ստեղծվել է այնպիսի մարդկանց կողմից, որոնք անմիջական կապ են ունեցել Հայոց ցեղասպանության կազմակերպման և իրականացման հետ։
«Թուրքիայի կողմից ցեղասպանության փաստի երկարամյա հերքման պատճառներից մեկն այն է, որ այն ճանաչելու դեպքում ստիպված են նորից գրել Թուրքական պետության պատմությունը՝ ընդունելով, որ դրա ակունքներում Ցեղասպանություն գործած հանցագործներ են կանգնած»,- հայտարարեց ցեղասպանագետը։
Դադրյանը նաև նշեց, որ 20-ականներին հրատարակվող թուրքական թերթերում, Ցեղասպանությունը դատապարտող գիտնականների, պետական պաշտոնյաների և այլ հեղինակավոր մարդկանց շատ հայտարարություններ կան։
Հայոց մեծ եղեռնը 20-րդ դարի առաջին ցեղասպանությունն է, որը կազմակերպվել և ծրագրավորված իրագործվել է երիտթուրքական կառավարության կողմից, ինչի հետևանքով Օսմանյան կայսրության կազմի մեջ մտնող Արևմտյան Հայաստանում, սրի է քաշվել ավելի քան 1,5 մլն. հայ։
Հայոց ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորhուրդը, Կանադայի խորհրդարանի համայնքների պալատը և Լեհաստանի սեյմը։ -0-
