Երևանում բացահայտել են ադրբեջանական ԶԼՄ-ների հերթական կեղծիքը Ղարաբաղի հարցի շուրջ Գյուլի արած հայտարարության վերաբերյալ

ԵՐԵՎԱՆ, 18 մայիսի. /Նովոստի-Արմենիա/. ՀՀ նախագահի վարչակազմի հասարակայնության և տեղեկատվության կենտրոնը հայտարարում է հերթական ադրբեջանական ապատեղեկատվության մասին, որն այս անգամ տարածել է «1news.az» կայքը։

Մայիսի 16-ին ադրբեջանական «1նյուզ.ազ» կայքը տեղեկատվություն է տարածել, ըստ որի Թուրքիայի նախագահ Աբդուլա Գյուլը Սիրիայում իբր հայտարարել է, թե Հայաստանը պետք է դուրս գա Ադրբեջանի տարածքներից և Հայաստանի առջև կբացվեն շատ նոր հնարավորություններ:

«Սա ադրբեջանական քարոզչամեքենայի հերթական հորինված կեղծիքն է և չի համապատասխանում իրականությանը: Ադրբեջանական կայքը հղում է անում երևի թե միայն իրեն հայտնի թուրքական լրատվամիջոցներին, այնինչ որևէ թուրքական լրատվամիջոցի լրահոսում նման տեղեկատվություն չկա»,- ասվում է հաղորդագրությունում։

«Ավելին` Սիրիայում Թուրքիայի նախագահի արած հայտարարություններն ու մեկնաբանությունները տեղադրված են Թուրքիայի նախագահի պաշտոնական կայքէջում` www.tccb.gov.tr, որտեղ ադրբեջանական կայքի մեջբերած հայտարարությունը նույնպես բացակայում է»,- նշվում է հաղորդագրությունում։  -0-