ՀՀ սփյուռքի նախարարը Լատինական Ամերիկայի հայերի խնդիրների լուծմանն ուղղված 1,2 մլն դոլար արժողությամբ ծրագիր է առաջարկում

ԵՐԵՎԱՆ, 18 մայիսի. /Նովոստի-Արմենիա/. ՀՀ սփյուռքի նախարարությունը 1,2 մլն արժողությամբ ծրագիր է ներկայացրել «Հայաստան» համահայկական հիմնադրամին՝  Լատինական Ամերիկայի հայերի մշակութային ժառանգության խնդիրների լուծման համար, երկուշաբթի լրագրողներին հայտնեց ՀՀ սփյուռքի նախարար Հրանուշ Հակոբյանը «Հայաստան» հիմնադրամի Հոգաբարձուների խորհրդի 18-րդ նիստում։

Ըստ նրա՝ ծրագիրը հաստատվել է ՀՀ կառավարության կողմից այս տարվա մարտին։

«Լատինական Ամերիկայի հայկական համայնքներում ակտիվացել է ուծացման գործընթացը, առկա է մայրենի լեզվի կորստի խնդիրը, բարձր տոկոս են կազմում խառն ամուսնությունները։ Այս խնդիրների լուծման համար մենք հուսով ենք «Հայաստան» հիմնադրամի հետ համագործակցությանը»,- նշեց նախարարը։

Նրա խոսքերով՝ Լատինական Ամերիկայի աշխարհագրական կտրվածությունը Հայաստանից, լատինաամերիկյան երկրների տնտեսական զարգացման ոչ բարձր մակարդակը, այնտեղ հայկական հեռուստաալիքների հեռարձակման բացակայությունը մարտահրավերներ են հայկական ինքնության պահպանման ճանապարհին այդ երկրներում։

«Ծրագիրը ենթադրում է ուսուցիչների վերապատրաստման, կրթական փոխանակման, դասագրքերի պատրաստման, երիտասարդական նախագծերի ծրագրերի իրականացում»,- ավելացրեց Հակոբյանը։

Նախարարն ավելացրեց նաև, որ ծրագրի շահառուներ պետք է դառնան Լատինական Ամերիկայի 180 հազար հայեր։

«Հայաստան» համահայկական հիմնադրամը ստեղծվել է 1992 թ.-ին՝  ՀՀ նախագահի հրամանով։

Գործունեության 15 տարիների ընթացքում հիմնադրամն իրագործել է Հայաստանի և ԼՂՀ զարգացմանն ուղղված 185 միլիոն դոլարի ծրագրեր։ Հիմնադրամի գործունեությունն ուղղված է Հայաստանի և Լեռնային Ղարաբաղի ենթակառուցվածքների զարգացմանը և բարեգործության խթանմանը։ Հիմնադրամի միջոցներով երկրում կառուցվել է ավելի քան 463,8 կմ երկարությամբ ճանապարհ, 211,8 կմ երկարությամբ ջրատար, 102 դպրոց, 410 բնակելի տուն, 35 բուժհաստատություն։-0-