ԵՐԵՎԱՆ, 15 մայիսի. /Նովոստի-Արմենիա/. Երևանի պետական համալսարանի ղեկավարությունը հարգել է բուհի կայացմանը մասնակցած գիտության հայտնի գործիչների հիշատակը։
Պետական համալսարանի 90-ամյակի տոնակատարության շրջանակներում բուհի դասախոսները, ուսանողները և շրջանավարտները ծաղկեպսակներ դրեցին հայ հանրաճանաչ գործիչների գերեզմանին Երևանի Կոմիտասի անվան պանթեոնում։
«ԵՊՀ ստեղծման մասին հրամանագիրը ստորագրվել է 1919 թվականի մայիսի 16-ին, և բուհի ծննդյան օրվա նախօրեին մենք հարգանքի տուրք ենք մատուցում և մեր շնորհակալությունն ենք հանձնում այն մարդկանց, ովքեր անգնահատելի ավանդ են ներդրել համալսարանի կայացման գործում»,- արարողության ընթացքում հայտարարեց ԵՊՀ ռեկտոր Արամ Սիմոնյանը։
Ըստ նրա՝ նրանց թվում են ԵՊՀ երկրորդ ռեկտոր, պրոֆեսոր Հակոբ Մանանդյանը, հայտնի ժողովրդական ճարտարապետ և ակադեմիկոս Ալեքսանդր Թամանյանը, պատմաբան, հրապարակախոս Լեոն, ԵՊՀ շրջանավարտներ Հովհաննես Շիրազը, Սիլվա Կապուտիկյանն ու այլոք։
Սիմոնյանը հայտնեց նաև, որ բուհի 90-ամյակին նվիրված հոբելյանական միջոցառումներն, ըստ էության, արդեն սկսվել են, իսկ վաղվանից մեկնարկում է պաշտոնական միջոցառումների ծրագիրը։
«Իր պատմության ընթացքում համալսարանը վերելքներ ու անկումներ է ապրել, այսօր մեր առջև նոր խնդիրներ են։ Համալսարանը լուրջ մրցակցային դաշտ ունի ոչ միայն Հայաստանի սահմաններում, այլ նաև նրանից դուրս»,- ասաց ԵՊՀ ռեկտորը։
Երևանի պետական համալսարանը հիմնադրվել է 1919 թվականին։ Մինչ այսօր Հայաստանի այս ամենախոշոր բուհն է ավարտել շուրջ 90 հազար մարդ: ԵՊՀ 21 ֆակուլտետում այժմ սովորում է 13 հազար ուսանող, ավելի քան 1200 դասախոսից 200-ը գիտությունների դոկտոր են, ավելի քան 500-ը՝ գիտությունների թեկնածու։ --0--
