«Նաիրիտ» գործարանի ղեկավարությունը հրապարակել է հրդեհի հետևանքով զոհվածների անունները

ԵՐԵՎԱՆ, 15 մայիսի. /Նովոստի-Արմենիա/. Երևանի «Նաիրիտ» քիմգործարանի ղեկավարությունը հրապարակել է նախօրեին գործարանի տարածքում տեղի ունեցած խոշոր հրդեհի հետևանքով զոհված չորս աշխատակիցների անունները։

Ինչպես տեղեկացրեց «Նաիրիտ» գործարանի մամուլի քարտուղար Անուշ Հարությունյանը, պատահարի հետևանքով զոհվել են քլորոպրենի ստացման տեղամասի հերթափոխի պետ 50-ամյա Լևոն Լևոնյանը, հիդրոքլորացման ապարատավար, բրիգադավար 51-ամյա Հովհաննես Հովհաննիսյանը, թորման ապարատավար 50-ամյա Վահան Գրիգորյանը և վերանորոգող-փականագործ 39-ամյա Արթուր Կարապետյանը։

«Գործարանի տնօրինությունը ոչ միայն ցավակցություն է հայտնում իր աշխատակիցների մահվան կապակցությամբ, այլև աշխատում է զոհվածների ընտանիքներին օգնություն ցուցաբերելու ուղղությամբ», - ասաց Հարությունյանը։

Նրա խոսքերով՝ հրդեհի հետևանքով տուժել է ութ մարդ, որոնցից չորսը գործարանի աշխատակիցներ են, մյուսները՝ փրկարարներ, նրանց առողջական վիճակը մտահոգիչ չէ:

Մամուլի քարտուղարը տեղեկացրեց նաև, որ պատահարի պատճառները դեռևս հայտնի չեն, ստեղծվել է հատուկ փորձագիտական հանձնաժողով՝ պատճառները բացահայտելու և տեխնածին աղետի հետևանքները չեզոքացնելու համար։

«Այս պահի դրությամբ գործարանը գտնվում է արտակարգ ռեժիմում, մնացած տեխնոլոգիական հոսքագծերն աշխատում են», - ասաց նա։

Տարածաշրջանի կաուչուկի խոշորագույն հսկայի՝ «Նաիրիտի» պայթյունը որոտացել է տեղական ժամանակով ժամը 18:00-ի սահմաններում՝ երկրորդ հերթափոխի աշխատանքը սկսելու պահին:

Երևանի «Նաիրիտ» քիմգործարանում տեղի ունեցած հրդեհի փաստի առթիվ հարուցվել է քրեական գործ է 231-րդ հոդվածի (պայթյունավտանգ օբյեկտներում անվտանգության կանոնների խախտելը, եթե մարդու առողջությանն անզգուշությամբ պատճառվել է ծանր կամ միջին ծանրության վտաս) և 285-րդ հոդվածի (վտանգավոր քիմիական կամ կենսաբանական այլ ազդակների կամ թունավոր նյութերի հետ վարվելու ընթացքում անվտանգության կանոնները խախտելը, եթե դա անզգուշությամբ մարդու առողջությանը վնաս է պատճառել, առաջացրել է համաճարակներ կամ անասնահամաճարակներ կամ այլ ծանր հետևանքներ) հատկանիշներով։

Քրեական գործի նախաքննությունը վարում է Ոստիկանությունը

«Նաիրիտ» գիտաարտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ «Նաիրիտ» առևտրային անվանումով պոլիքլորոպրենը ձեռնարկությունն արտադրում է 1940 թվականից։ -0-