«Երևանի տեղական ինքնակառավարման մասին» օրենքը թույլ կտա երկրի կյանքում ակտիվացնել քաղաքական կուսակցությունների մասնակցությունը
«Երևանի տեղական ինքնակառավարման մասին» նոր օրենքը թույլ կտա երկրի կյանքում ակտիվացնել քաղաքական կուսակցությունների մասնակցությունը տեղական ինքնակառավարման մարմինների մակարդակով, կարծում է ԱԺ պետաիրավական հարցերի հանձնաժողովի նախագահ Դավիթ Հարությունյանը:
«Տեղական ինքնակառավարումը երբեք քաղաքականացված չի եղել: Հիմա դա այդպես չէ, իսկ դա նշանակում է, որ քաղաքական կուսակցությունները երկրի զարգացման գործում հիմնական դերը պետք է ստանձնեն»,- երեքշաբթի մամուլի ասուլիսի ժամանակ ասաց Հարությունյանը:
Նրա խոսքերով, եթե քաղաքական կուսակցությունները տեղական ինքնակառավարման մակարդակով պատասխանատվություն չեն կրում, նշանակում է, որ ինքնադրսևորվելու միակ ոլորտը մնում է Ազգային ժողովը:
Ընդ որում, Հարությունյանը կարծում է, որ այդ դեպքում խորհրդարան կարող են մտնել այնպիսի կուսակցություններ, որոնք մինչ այդ ոչ մի տեղ չեն դրսևորել իրենց և ոչ մի պատասխանատվություն չեն կրել:
Հարությունյանը վստահ է, որ հետագայում մայրաքաղաքի տեղական ինքնակառավարման մարմինների ընտրությունների մոդելը կտարածվի նաև խոշոր ոլորտների վրա:
«Բոլոր այդ միջոցները մեզ առավել ուժեղ քաղաքական կուսակցություններ կտան, և ժամանակի ընթացքում կբարելավեն քաղաքական մշակույթը»,- ասաց Հարությունյանը:
«Տեղական ինքնակառավարման մասին» օրենքն ԱԺ-ն ընդունել է 2008թ. դեկտեմբերի 26-ին:
Մայիսի 31-ին տեղի կունենա Երևանի Ավագանու խորհրդի ընտրությունները: «Երևանում տեղական ինքնակառավարման մասին» նոր օրենքի համաձայն նախատեսվում է Երևանում ստեղծել 65 անդամներից բաղկացած և համամասնական ընտրակարգով ձևավորվող Ավագանու խորհուրդ։
Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի 50%՝ գումարած մեկ ձայն:
Կենտրոնական ընտրական հանձնաժողովի տվյալներով, Երևանի Ավագանու խորհրդի ընտրություններին կմասնակցեն «Բարգավաճ Հայաստան» կուսակցությունը, ՀՀԿ, «Օրինաց Երկիր» կուսակցությունը, ՀՅԴ-ն, Ժողովրդական կուսակցությունը, ՀՀ Աշխատավորական սոցիալիստական կուսակցությունը և ՀԱԿ նախընտրական դաշինքը։ -0-
