ԵՐԵՎԱՆ, 11 մայիսի. /Նովոստի-Արմենիա/. Հարուցվել է քրեական գործ զանգվածային անկարգությունների գործով վկաների հանդեպ բռնություն կիրառելու փաստի առթիվ, երկուշաբթի «Նովոստի-Արմենիա» գործակալությանը հայտնեցին ՀՀ գլխավոր դատախազության մամուլի ծառայությունից:
Ինչպես նշված է հայտարարության մեջ, 2008 թվականի մարտի 1-2-ին Երևան քաղաքում տեղի ունեցած զանգվածային անկարգությունները կազմակերպելու և ապօրինի կերպով ռազմամթերք ձեռք բերելու և պահելու համար ամբաստանյալ Սասուն Միքայելյանին ՀՀ քրեական օրենսգրքի 225-րդ հոդվածի 1-ին մասով և 235-րդ հոդվածի 1-ին և 2-րդ մասերով առաջադրված մեղադրանքը Կոտայքի մարզի ընդհանուր իրավասության դատարանում ըստ էության քննության ժամանակ, վկաներ Էդիկ Խաչատրյանը, Արսեն Մկրտչյանը և Յաշա Մելքոնյանը հայտարարել են իրենց նկատմամբ կիրառված խորթ մեթոդների մասին:
Մասնավորապես վկա Յ.Մելքոնյանը հայտարարել է, որ իր նկատմամբ բռնություն է գործադրել ոստիկանության Հրազդանի բաժնի պետի տեղակալ Ս.Մարկոսյանը՝ բերման ենթարկելիս, իսկ վկաներ Է.Խաչատրյանն ու Ա.Մկրտչյանը հայտարարել են, որ իրենց նկատմամբ քննությանը խորթն մեթոդներ են կիրառվել նախաքննության ընթացքում:
Նկատի ունենալով, որ վկաների կողմից դատարանում հնչեցված հայտարարությունները վերաբերում են ՀՀ քրեական օրենսգրքի 341-րդ հոդվածով նախատեսված արարք կատարելուն՝ ՀՀ գլխավոր դատախազի ցուցումով նշված երեք դեպքերով հարուցվել են առանձին քրեական գործեր, որոնց նախաքննությունը հանձնարարվել է ՀՀ հատուկ քննչական և ՀՀ ազգային անվտանգության ծառայություններին: Ոստիկանության աշխատակցի գործողությունների վերաբերյալ Յ.Մելքոնյանի հայտարարության հիման վրա հարուցված քրեական գործով նախաքննությունը գտնվում է Հատուկ քննչական ծառայության, իսկ Է.Խաչատրյանի և Ա.Մկրտչյանի հայտարարությունների հիման վրա հարուցված քրեական գործերը՝ Ազգային անվտանգության ծառայության վարույթներում:
«Ցուցում է տրվել ձեռնարկել անհրաժեշտ բոլոր միջոցները հայտարարություններում հնչեցված հանգամանքները պարզելու և սեղմ ժամկետներում անհրաժեշտ որոշումներ կայացնելու համար»,-ասված է հայտարարության մեջ:-0-
