ՀՀ պաշտպանության նախարարության ռազմաավիացիոն ինստիտուտը հանդիսավոր կերպով նշեց 16-ամյակը

ՀՀ պաշտպանության նախարարության Ա. Խանփերյանցի անվան ռազմաավիացիոն ինստիտուտը հանդիսավոր կերպով նշեց 16-ամյակը։

Ուսումնարանի դասախոսներին և սաներին շնորհավորելու էին եկել հայկական էստրադայի հայտնի աստղեր, տարբեր հասարակական կազմակերպությունների ներկայացուցիչներ։

Իր ողջույնի խոսքում ինստիտուտի պետ, գնդապետ Դանիել Բալայանը նշեց մայիսի խորհրդանշականությունը հայ ժողովրդի պատմության մեջ։ Նա հիշեցրեց, որ հենց մայիսին են տարվել Սարդարապատի և Բաշ-Ապարանի հաղթանակները, վերցվել է Շուշին: Հայ ժողովուրդը ԽՍՀՄ մյուս ժողովուրդների հետ միասին հաղթանակ է տարել հիտլերյան Գերմանիայի նկատմամբ։ «Մայիս ամիսը հայ ժողովրդի ամիսն է»,- ընդգծեց Բալայանը։

Նա պատմեց նաև ինստիտուտի աշխատանքի առաջին տարիների մասին, որոնք բաժին ընկան 90-ական թվականների սկզբներին։ Ուսումնարանի պետը հիշեցրեց, որ ԽՍՀՄ փլուզումից հետո Հայաստանը ստացավ ռազմատեխնիկա, բայց չուներ համապատասխան ավիացիոն կադրեր։ Այդ իսկ 1994 թվականին ուսումնարանների սաները ընդգրկվեցին մարտական հաշվարկներում։

Համերգի ընթացքում ժողովրդական երգերի հայտնի կատարող Արսեն Գրիգորյանին երիտասարդության ազգային-հայրենասիարական դաստիարակության գործում ունեցած ավանդի համար պաշտպանության նախարարի անունից հանձնվեց «Գարեգին Նժդեհ» շքանշանը։

ՀՀ պաշտպանության նախարարության Ա. Խանփերյանցի (Ս. Խուդյակով) անվան ռազմաավիացիոն ինստիտուտը հիմնադրվել է 1993 թվականի ապրիլին՝ որպես ռազմական ուսումնարան, իսկ 1999 թվականից ուսումնարանին է շնորհվել ռազմական ինստիտուտի կարգավիճակ։ Ինստիտուտը պատրաստում է ռազմական օդաչուների, ՀԿՊ մասնագետների, ինչպես նաև ավիացիոն տեխնիկների։  -0-