Պրահայում ՀՀ նախագահը մի շարք հանդիպումներ կունենա եվրոպական պետությունների ղեկավարների հետ
ՀՀ նախագահ Սերժ Սարգսյանը Պրահայում մի շարք հանդիպումներ կունենա եվրոպական պետությունների ղեկավարների հետ, չորեքշաբթի «Նովոստի» միջազգային մամուլի կենտրոնում մամուլի ասուլիսի ժամանակ ասաց ՀՀ փոխարտգործնախարար Կարինե Ղազինյանը:
ՀՀ նախագահ Սերժ Սարգսյանը մայիսի 7-ին կմեկնի Պրահա, որտեղ կմասնակցի և ելույթ կունենա ԵՄ «Արևելյան գործընկերության» գագաթնաժողովին:
«Հաշվի առնելով տարածաշրջանի վերջին գործընթացները՝ Պրահայում տեղի կունենա Սարգսյանի հանդիպումը ադրբեջանցի գործընկեր Իլհամ Ալիևի հետ: Թուրքական կողմի նախաձեռնությամբ, քննարկվում է Թուրքիայի նախագահ Աբդուլա Գյուլի հետ հանդիպման հնարավորությունը»,- ասաց Ղազինյանը:
Նա նշեց նաև, որ երկրի ղեկավարի այցի ժամանակացույցում ներառված են նաև հանդիպումներ Արտաքին քաղաքականության և անվտանգության հարցերով Եվրամիության գերագույն ներկայացուցիչ Խավիեր Սոլանայի և Եվարահանձնաժողովի նախագահ Ժոզե Մանուել Բարոզոյի հետ:
«Հաշվի առնելով այն, որ այցը կարճաժամկետ է, Սարգսյանի ժամանակացույցում ներառված են հանդիպումներ միայն եվրոպական այն երկրների նախագահների հետ, որոնց հետ նախագահն իր ընտրվելուց հետո անձնական հանդիպում չի ունեցել»,- ասաց Ղազինյանը:-0-
