ԵՐԵՎԱՆ, 4 մայիսի. /Նովոստի-Արմենիա/. Հայաստանում Միջուկային բժշկության կենտրոնի ստեղծման ծրագրի շրջանակներում «Հայաստանում բժշկական ծրագրերի զարգացման» կազմակերպության կողմից Երևանի քաղցկեղաբանության ֆրանսիական ինստիտուտի հիմնադրման նախագծի իրականացման հետ կապված հարցերն է ՀՀ վարչապետ Տիգրան Սարգսյանը շաբաթ քննարկել տվյալ կազմակերպության տնօրեն, դոկտոր Նորբեր Ավետյանի հետ։
Ինչպես «Նովոստի-Արմենիա» գործակալությանը հայտնեցին ՀՀ կառավարության հասարակայնության և մամուլի հետ կապերի վարչությունից, վարչապետը նշել է, որ առողջապահության ոլորտի զարգացումը և, մասնավորապես, Միջուկային բժշկության կենտրոնի ստեղծումը ՀՀ կառավարության առաջնահերթություններից է, և կառավարությունը հավանություն է տալիս Երևանի քաղցկեղաբանության ֆրանսիական ինստիտուտի հիմնադրման նախագծին, որը հիշյալ կենտրոնի ստեղծման բաղկացուցիչ մասերից է։
Սարգսյանը հայտնել է, որ Ավետյանի ղեկավարած կազմակերպության ներկայացուցիչները ներգրավվել են Միջուկային բժշկության կենտրոնի ստեղծման ծրագիրը համակարգող աշխատանքային խմբի մեջ, որի շրջանակներում հնարավոր կլինի քննարկել նաև Երևանի քաղցկեղաբանության ֆրանսիական ինստիտուտի հիմնադրմանն առնչվող նախապատրաստական հարցերը։
Դոկտոր Ավետյանն ընդգծել է, որ քննարկվող բոլոր հարցերի շուրջ համաձայնության գալու դեպքում ֆրանսիական կազմակերպությունը պատրաստ է Հայաստան բերել եվրոպական լավագույն սարքավորումներ և մեթոդիկա։
Հիմնադրումից հետո ինստիտուտում կաշխատեն նաև տեղի բարձր որակավորում ունեցող մեծ թվով մասնագետներ, ովքեր առաջիկա տարիներին պարբերաբար կվերապատրաստվեն Ֆրանսիայում։
Ըստ դոկտոր Ավետյանի, այսօր արդեն արտերկրի ներդրողները պատրաստ են որոշակի ներդրումներ կատարել առաջարկվող նախագիծը Հայաստանում իրականացնելու համար։
Մեկ անգամ ևս նշելով Միջուկային բժշկության կենտրոնի և դրա շրջանակներում նախատեսվող ծրագրերի կարևորությունը Հայաստանի առողջապահության և գիտության զարգացման համար՝ վարչապետն ընդգծել է, որ ՀՀ կառավարությունը պատրաստ է ֆրանսիական կազմակերպության կողմից առաջարկվող նախագծի ներդրումային ծրագիրը, ժամանակացույցը ներկայացնելու դեպքում, հնարավորինս աջակցել ծրագրի իրականացմանը։--0--
