ԵՐԵՎԱՆ, 3 մարտի./Նովոստի–Արմենիա/. Հայաստանը մտահոգված է այն երկրների շրջանակի ընդլայնմամբ, որոնց հետ Թուրքիան խնդիրներ ունի, երեքշաբթի հայտարարեց ՀՀ վարչապետ Նիկոլ Փաշինյանը Թբիլիսիում հայ համայնքի հետ հանդիպման ժամանակ։
«Թուրքիայի գործողությունները Սիրիայում ապակառուցողական են։ Մենք դրա մասին արդեն հայտարարել ենք։ Սակայն մեզ մտահոգում է այն փաստը, որ ընդլայնվում է հարևանների շրջանակը, որոնց հետ Անկարան խնդիրներ ուն, դա Հունաստանն է, Կիպրոսը, Սիրիան, անգամ Իրաքը։ Եվ Թուրքիայի նման ռազմավարությունը կամ քաղաքականությունը մեզ մտահոգում է», – ասաց նա։
Վարչապետի խոսքով, Երևանը պարբերաբար իրազեկում է իր գործընկերներին Անկարայի նման մարտավարության պատճառով առաջացած մտահոգության մասին և ակնկալում է համաշխարհային հանրության համապատասխան գնահատականը։
Իրավիճակը Սիրիայում
Վերջին շրջանում սրվել է Թուրքիայի և Սիրիայի ռազմական դիմակայությունն Իդլիբ նահանգի տարածքում։ Անկարան ռազմական աջակցություն է ցուցաբերում այնտեղ գործող գրոհայիններին։ Սիրիայի կառավարական զորքերն իրենց հերթին գնդակոծում են Իդլիբում գտնվող թուրք զինվորականներին, կան զոհեր։ Փետրվարի 29–ին Թուրքիայի նախագահ Ռեջեփ Թայիպ Էրդողանը հայտարարել է, որ ՌԴ նախագահ Վլադիմիր Պուտինի հետ հեռախոսային բանակցությունների ընթացքում նա առաջարկել է Ռուսաստանին չմիջամտել Թուրքիայի ԶՈւ–ի և սիրիական զորքերի միջև դիմակայությանը։ Մարտի 5–ին նախատեսված է երկու երկրների առաջնորդների հանդիպումը, որի ընթացքում կողմերը կքննարկեն սիրիական հարցը։
Դեռ 2019թ.–ի դեկտեմբերի 13–ին ՀՀ վարչապետ Նիկոլ Փաշինյանը կոչ էր արել միջազգային հանրությանը զբաղեցնել հստակ դիրքորոշում հարևան երկրների նկատմամբ Թուրքիայի կողմից իրականացվող գործողությունների հարցում։ Նա նշել էր, որ Թուրքիան ագրեսիվ քաղաքականություն է վարում ոչ միայն Սիրիայի, այլև Իրաքի, Կիպրոսի և Հունաստանի նկատմամբ։ Փաշինյանը նաև մատնանշել էր այն փաստը, որ Թուրքիան շրջափակման մեջ է պահում Հայաստանին։ Վարչապետը հիշեցրել է, որ Հայաստանի բոլոր կառավարությունները բազմիցս հայտարարել են, որ պատրաստ են առանց նախապայմանների բարիդրացիական հարաբերություններ հաստատել Թուրքիայի հետ։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում