Ռուսաստանն ու Թուրքիան քննարկել են Երևանի ու Բաքվի հարաբերություններն ու «3+3» ձևաչափը` Հայաստանի մասնակցությամբ

ԵՐԵՎԱՆ,15 նոյեմբերի./Նովոստի–Արմենիա/. Երկուշաբթի Ստամբուլում տեղի են ունեցել ՌԴ փոխարտգործնախարար Անդրեյ Ռուդենկոյի և Թուրքիայի փոխարտգործնախարար Սեդաթ Օնալի խորհրակցությունները։ Այս մասին նշվում է ՌԴ ԱԳՆ–ի կայքում։


Կողմերը քննարկել են Հարավային Կովկասում և Կենտրոնական Ասիայում ռուս–թուրքական փոխգործակցության ակտուալ հարցերի լայն շրջանակ։

Բաքվի և Երևանի հարաբերությունների կարգավորման համատեքստում կարևորվել է Ռուսաստանի, Ադրբեջանի և Հայաստանի առաջնորդների` 2020թ.–ի նոյեմբերի 9–ի և 2021թ.–ի հունվարի 11–ի եռակողմ պայմանավորվածությունների հետևողական իրականացումը։ Ընդգծվել է առաջիկայում Հարավային Կովկասի համար «3+3» տարածաշրջանային խորհրդակցական մեխանիզմի (Ադրբեջան, Հայաստան, Վրաստան +Ռուսաստան, Թուրքիա, Իրան) գործարկման ակտուալությունը։

Նոր հարթակի գաղափարի մասին

Տարածաշրջանի վեց երկրների համագործակցության նոր հարթակի (այսպես կոչված «վեցի հարթակ» կամ «3+3» ձևաչափ) ստեղծման գաղափարով պաշտոնապես Անկարան հանդես է եկել 2020թ.–ի աշնանը արցախյան պատերազմի ավարտից անմիջապես հետո։ Այս նախաձեռնության մասին Թուրքիայի նախագահ Ռեջեփ Թայիպ Էրդողանն առաջին անգամ հայտարարել է նախորդ տարվա դեկտեմբերի 11–ին Բաքու կատարած այցի ժամանակ` անվանելով այն «Վեցի հարթակ»։

Հիմա հարթակի գործարկմանն ուղղված բանակցություններում ակտիվորեն ներգրավված է Մոսկվան։ ՌԴ ԱԳ նախարար Սերգեյ Լավրովի խոսքով, իրանական կողմը դրական է վերաբերվել այդ նախաձեռնությանը, ինչպես նաև Ադրբեջանն ու Թուրքիան, աշխատանքներ են ընթանում հայ գործընկերների հետ։ Մոսկվայում հույս ունեն, որ Վրաստանը ևս, չնայած բոլոր խնդիրներին, «կկարողանա իր արմատական հետաքրքրությունը տեսնել խորհրդակցությունների նման մեխանիզմի ստեղծման մեջ»։–0–