ԵՐԵՎԱՆ, 30 հոկտեմբերի./Նովոստի–Արմենիա/. Անկարան դատապարտել է ԱՄՆ Ներկայացուցիչների պալատի կողմից Հայոց ցեղասպանությունը ճանաչող բանաձևի ընդունումը ու հայտարարել, որ այս որոշումը «ոչինչ չի նշանակում Թուրքիայի կառավարության և ժողովրդի համար»։
Հիշեցնենք, որ ԱՄՆ Ներկայացուցիչների պալատի անդամները նախօրեին ընդունել են թիվ 296 բանաձևը, որով ճանաչում ու դատապարտում են Օսմանյան կայսրությունում տեղի ունեցած Հայոց ցեղասպանությունը։ Փաստաթղթի կողմ է քվեարկել 405 կոնգրեսական, դեմ` 11–ը, ձեռնպահ է մնացել 3 կոնգրեսական։
Քվեարկությունից րոպեներ անց Թուրքիայի ԱԳ նախարար Մևլութ Չավուշօղլուն գրառում է կատարել Twitter–ի իր միկրոբլոգում` բանաձևի ընդունումը կապելով Սիրիայի հյուսիսում Թուրքիայի իրականացվող ռազմական գործողությունների հետ։
«Նրանք, ում պլանները տապալվել էին, դիմում են հնաոճ բանաձևերի օգնությանը։ Այն շրջանակները, որոնք հավատում են, թե այս կերպ կարող են վրեժ լուծել, սխալվում են: Պատմությունը քաղաքական նպատակներով օգտագործելու այս ամոթալի որոշումը առոչինչ է մեր կառավարության և ժողովրդի համար», – գրել է Չավուշօղլուն։–0–