ԵՐԵՎԱՆ, 14 նոյեմբերի./Նովոստի-Արմենիա/. ՀՀ վարչապետ Նիկոլ Փաշինյանը Հանրային հեռուստաընկերությանը տված հարցազրույցում հերքել է ընդդիմության մեղադրանքները՝ Ղարաբաղի շուրջ բանակցությունները վարելու անկարողության մեջ:
Հաղորդավար Պետրոս Ղազարյանը հարցրել է, թե ինչպես նա կմեկնաբանի ընդդիմության հայտարարություններն այն մասին, որ եթե նա ստորագրել է «կապիտուլյացիայի» մասին, ապա չի կարող արդյունավետ ձևով վարել բանակցությունները: Ուստի ընդդիմությունը համարում է, որ իշխանությունը պետք է փոխվի և պետք է գա նոր մարդ, ով նորից կսկսի:
«Բանակցությունները հիմա են սկսվելու և մենք կարող ենք և ի վիճակի ենք բանակցել և բանակցում ենք: Ի՞նչ ենք մենք ուզում ենք: Մենք ուզում ենք, որպեսզի Հայաստան- Իրան երկաթուղին աշխատի՝ Նախիջևանով։ Մենք խոսում ենք տրասնպորտային ենթակուցվածքների ապաշրջափակման մասին: Սա Թուրքիայի չի վերաբերվում, որովհետև այն համաձայնության մասի չի: Մենք ուզում ենք դեպի Ռուսաստան ունենալ ոչ թե մեկ, այլ մի քանի հնարավոր ճանապարհներ»,- նշել է նա:
Նրա խոսքով, եթե այդ բանակցությունների արդյունքում մենք կարողանանք հասնել մեր խնդիրներին, ապա Հայաստանին շրջադարձային փոփոխություններ են սպասվում, եթե ի վերջո երկաթուղին Հայաստանում դառնա իրական գործոն, որը Հայաստանը կկապի Պարսից ծոցի և Ռուսաստանի հետ:
«Սրանք նույնպես նպատակներ են, որոնք նաև այս փաստաթղթի շնորհիվ կարող են իրագործվել, կարող են նաև չիրագործվել»,- նշել է Փաշինյանը:
Հարցին, թե արդյոք նախնական համաձայնություն կա այս կետերով, Փաշինյանը նշել է, որ կա ըմբռնում, բայց սա բանակցությունների հարց է:
Ներքաղաքական ճգնաժամ Երևանում
Արդեն չորրրորդ օրն է` կազմակերպվում են բողոքի զանգվածային ակցիաներ Արցախում ռազմական գործողությունների դադարեցման հայտարարության կապակցությամբ, որը ստորագրվել է ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի և Ադրբեջանի նախագահ Իլհամ Ալիևի կողմից։ Փաստաթուղթը նախատեսում է տարածքային զգալի զիջումներ Ադրբեջանին։ Քաղաքական գործիչները, պատգամավորները, հասարակական գործիչներն ու շարքային քաղաքացիները, որոնք վրդովված են այդ հայտարարության ստորագրմամբ, որը շատ անսպասելի էր հասարակության համար և ընկալվեց որպես Հայաստանի ամբողջական կապիտուլյացիա, պահանջում են վարչապետի հրաժարականը և Արցախի հարցով հայտարարության ստորագրության չեղարկում։ Խորհրդարանական ընդդիմությունը մի քանի անգամ փորձեց գումարել ԱԺ արտահերթ նիստ, որպեսզի չեղարկի երկրում գործող ռազմական դրությունն ու Արցախի հարցով փաստաթուղթը, սակայն «Իմ քայլը» իշխանական խմբակցության բացակայության պարագայում հնարավոր չէ ապահովել քվորում։ Օրերս «Իմ քայլը» խմբակցությունը հանդես եկավ հայտարարությամբ` նշելով, որ չի պատրաստվում մասնակցել Հայաստանում կայունության խաթարման նպատակ ունեցող որևէ նիստի և վտանգել ռազմաճակատն ու այն պահող մարդկանց կյանքը։–0– Նոյեմբերի 11–ին Ազատության հրապարակում մեկնարկել է 17 ընդդիմադիր կուսակցությունների հանրահավաքը, որը շարունակվել է կառավարության և Ազգային ժողովի շենքերի մոտ։ Հանրահավաքի նպատակն է հասնել ՀՀ վարչապետ Նիկոլ Փաշինյանի հրաժարականի` ի նշան Արցախի հարցով հայտարարության ստորագրման դեմ բողոքի, որով նախատեսվում են զգալի տարածքային զիջումներ Ադրբեջանին։ Ավելի վաղ ՀՀ ոստիկանությունը հորդորել էր զերծ մնալ հավաքներ և հանրային միջոցառումներ կազմակերպելուց, անցկացնելուց և դրանց մասնակցելուց` հիշեցնելով, որ սեպտեմբերի 27-ին ՀՀ-ում հայտարարվել է ռազմական դրություն, որի պայմաններում արգելվում են հավաքներ և հանրային միջոցառումներ կազմակերպելը, անցկացնելն ու մասնակցելը։ Բերման է ենթարկվել մոտ 130 մարդ։ ՀՔԾ–ն հայտարարեց, որ հարուցվել է քրեական գործ «Զանգվածային անկարգություններ» հոդվածով։–0–
