Քարինտակի հերոսական պաշտպանությունը շրջադարձային էր ղարաբաղյան պատերազմի պատմության մեջ. իրադարձությունների մասնակից

Ղարաբաղի Շուշիի շրջանի Քարինտակ գյուղի հերոսական պաշտպանությունը, որը նշվում է այս օրերին, շրջադարձային փուլ է դարձել ղարաբաղյան պատերազմի պատմության մեջ, ուրբաթ «Նովոստի» միջազգային մամուլի կենտրոնում ասաց Արցախի ՊԲ փոխգնդապետ, գյուղի ինքնապաշտպանության ջոկատի մարտիկ Շահեն Այդինյանը:

«Քարինտակի պաշտպանությունը մեզ դժվարությամբ է տրվել, ուժերը հավասար չէին տեղաբաշխված, բայց այդ պայքարը շրջադարձային եղավ պատմության մեջ, և հատկապես Քարինտակի հաղթանակով է սկսվել հայկական տարածքների ազատագրումը»,- ասաց Այդինյանը:

Ըստ նրա, ադրբեջանցիներին թվում էր, որ նրանց կհաջողվի մի քանի ժամում գրավել գյուղը: «Նրանք մեր դեմ ուղարկեցին երկու գումարտակ (1800 մարդ), իսկ մենք ընդամենը շուրջ 60 չպատրաստված կամավորականներ ունեինք, որոնցից միայն 40-ն էին զինված ավտոմատներով: Նրանք գյուղի սովորական բնակիչներ էին»,- նշեց Այդինյանը:

Նա նշեց, որ Քարինտակի բնակիչներից ոչ մեկ չլքեց գյուղը:
Քարինտակի պաշտպանության մասնակից Արծվիկ Բաղդասարյանն իր հերթին նշեց, որ Քարինտակի պաշտպանության կռիվների ժամանակ ադրբեջանցիները 201 մարդ կորցրեցին: Մեր զոհերի թիվը հասավ 22-ի:
«Ողջ ճակատամարտի ընթացքում մեզ ուժ էր հաղորդում այն, որ մեր հետևում մեր ընտանիքներն ու երեխաներն էին»,- ասաց Բաղդասարյանը:

«Ժառանգություն» ընդդիմադիր խորհրդարանական խմբակցության քարտուղար Լարիսա Ալավերդյանն էլ նշեց, որ ադրբեջանցիները հրաժարվում էին իրենց զոհված զինվորների դիակները վերցնել, և հետագայում նրանց անհայտ կորած էին հայտարարում:

«Քարինտակի օրինակը շատ հստակ ցույց է տալիս, թե որտեղից են նրանց մոտ այդքան անհայտ կորածներ հայտնվում»,- նշեց Ալավեդրյանը:

Ըստ նրա, հայերը ստիպված էին իրենք թաղել հակառակորդի զինվորներին:
1992թ.-ի հունվարի 25-ի լույս 26-ի գիշերը ՕՄՕՆ-ի երկու ադրբեջանական ստորաբաժանումներ շրջապատեցին Քարինտակը՝ տեղի բնակիչներին ոչնչացնելու և նրանց ունեցվածքը թալանելու նպատակով:

Օպերացիան նաև տակտիկական նպատակ էր հետապնդում՝ ճանապարհ բացել դեպի հանրապետության հարավային հատված: Հակառակորդը հույս ուներ կայծակնային գործողությունների միջոցով հասնել նպատակին: Սակայն ընդամենը մի քանի ավտոմատներ, ինքնաշեն հրացաններ ու նռնակներ ունենալով՝ քարինտակցիները հետևողականորեն և անձնուրաց կերպով կարողացան կանխել հակառակորդի գործողությունները:
Քարինտակի բնակիչներին օգնության հասան մոտակա Շոշ, Սիզնեկ, Սղնախ, Կարմիր գյուղերի ինքնապաշտպանական ջոկատները:
Այդ ճակատամարտում արդբեջանցիները հսկայական կորուստներ տարան:-0-