ԼՂՀ նախագահը մեդալներ է հանձնել տնտեսության, գիտության և քաղաքականության ոլորտների մի խումբ ներկայացուցիչների

ՍՏԵՓԱՆԱԿԵՐՏ, 19 սեպտեմբերի. /Նովոստի-Արմենիա/. Լեռնային Ղարաբաղի Հանրապետության նախագահ Բակո Սահակյանը պետական մեդալներ է հանձնել ԼՂՀ հռչակման 20-րդ տարեդարձի կապակցությամբ և Հայաստանի Հանրապետությանը մատուցած ծառայությունների համար պարգևատրված ՀՀ սոցիալ-տնտեսական, գիտակրթական, քաղաքական ու մշակութային բնագավառների մի խումբ ներկայացուցիչների, հաղորդում է ԼՂՀ նախագահի աշխատակազմի Տեղեկատվության գլխավոր վարչությունը:

Միջոցառումն անցկացվել է երկուշաբթի ՀՀ-ում ԼՂՀ մշտական ներկայացուցչությունում: 
Բակո Սահակյանը շնորհավորել է ներկաներին ԼՂՀ և Հայաստանի անկախության 20-րդ տարեդարձի կապակցությամբ և նշել, որ հայ ժողովուրդը չափազանց մեծ գին է վճարել անկախ պետություն ունենալու համար:
«Մեր հաղթանակները ձեռք են բերվել ողջ աշխարհի հայության ընդհանուր ջանքերով, և Հայաստան-Արցախ-Սփյուռք կուռ եռամիասնությունը հանդիսանում է հայոց անկախ պետականաշինության հիմնասյուներից մեկը»,- ընդգծեց նա:

Հանդիսավոր արարողությանը մասնակցում էին ԼՂՀ կրթության և գիտության նախարար Վլադիկ Խաչատրյանը, մշակույթի և երիտասարդության հարցերի նախարար Նարինե Աղաբալյանը, ԱԺ ֆինանսաբյուջետային ու տնտեսական կառավարման հարցերի մշտական հանձնաժողովի նախագահ Արպատ Ավանեսյանը: -0-