ԵՐԵՎԱՆ, 15 փետրվարի. /Նովոստի-Արմենիա/. Ղարաբաղում Ադրբեջանի ռազմական նոր ագրեսիայի փորձերը Բաքվի համար ավելի ծանր կլինեն, չորեքշաբթի լրագրողներին ասաց Հայաստանի արտաքին գործերի փոխնախարար Շավարշ Քոչարյանը «Ստեփանակերտի շրջափակման ճեղքումը` 25 տարի անց» փորձագիտական խորհրդակցության ընթացքում։
«Ապրիլյան իրադարձությունները ցույց տվեցին, որ մենք միշտ պետք է պատրաստ լինենք Ադրբեջանի ցանկացած արկածախնդրությանը, ինչը պարզ էր մինչև այդ էլ, իսկ հիմա ավելի ակնհայտ դարձավ։ Կարծում եմ` եթե Ադրբեջանը ևս մեկ նմանատիպ փորձ կատարի, ապա այս անգամ հետևանքները Բաքվի համար ավելի ծանր կլինեն»,– ասաց Քոչարյանը։
Ինչպես կարծում է դիվանագետը, ռազմական ագրեսիայի զսպման հիմնական մեխանիզմն այսօր պետք է դառնան ոչ թե բանակցությունները և փոխզիջումները, այլ ավելի սերտ աշխատանքը միջազգային բոլոր կառույցների և միջնորդների հետ` բոլոր փաստերը բացահայտելու և ներկայացնելու համար։
«Մարդու իրավունքներն անհամատեղելի են Ադրբեջանի հետ, որտեղ պետական մակարդակով ահաբեկչության քաղաքականություն է տարվում, իսկ բանակցությունների ձևական մասնակցությունը վկայում է այն մասին, որ դրանց սկզբնական նպատակն անփոփոխ է` հակամարտության ուժային լուծումը և արցախահայ բնակչության նկատմամբ ցեղասպանության քաղաքականությունը»,– ասաց Քոչարյանը։
Ըստ նրա, նմանատիպ քայլերի իրագործումն Ադրբեջանի կողմից կհանգեցնի միայն ջանքերի կենտրոնացման Ղարաբաղի միջազգային ճանաչման հարցում։
Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։
Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։
1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։
Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակում։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում