ԵՐԵՎԱՆ, 30 դեկտեմբերի./Նովոստի–Արմենիա/. Ամերիկյան
Forbes ամսագիրը ներկայացրել է Լաչինի միջանցքի արգելափակման պատճառով Լեռնային Ղարաբաղում առաջացած հումանիտար աղետի սպառնալիքի մասին։
Ստեփանակերտ-Գորիս (Լաչինի միջանցք) միջպետական ավտոճանապարհը՝ Արցախը Հայաստանին և աշխարհին կապող միակ ճանապարհը, արդեն 18-րդ օրն է, ինչ արգելափակվել է ադրբեջանցի կեղծ բնապահպանների կողմից, ինչի հետևանքով Արցախի 120.000 բնակիչներին սպառնում է հումանիտար աղետ, Հայաստանից սննդամթերքի, վառելիքի, դեղորայքի և առաջին անհրաժեշտության այլ ապրանքների մատակարարումը դարձել է անհնար։
Forbes-ի հոդվածում արված են մեջբերվումներ ՅՈՒՆԻՍԵՖ-ի հայտարարությունից, որը նախազգուշացնում է Լաչինի միջանցքի փաստացի փակման հետևանքով Լեռնային Ղարաբաղում հումանիտար իրավիճակի վատթարացման մասին:
Ավելի վաղ ԱՄՆ ՄԶԳ ադմինիստրատոր Սամանթա Փաուերը կոչ էր արել անհապաղ բացել Լաչինի միջանցքը, որը կարևոր երթուղի է անհրաժեշտ սննդամթերքի և դեղորայքի մատակարարման համար:
Հատվածներ են մեջբերվում այս թեմայով Human Rights Watch-ի հայտարարություններից և ՄԱԿ-ի Անվտանգության խորհրդում տեղի ունեցած քննարկումները, որի ընթացքում ՄԱԿ-ի գլխավոր քարտուղարի Եվրոպայի, Կենտրոնական Ասիայի և Ամերիկայի հարցերով օգնական Միրոսլավ Յենչան ասել է, որ «լարվածության և միջադեպերի ներկայիս սրացումը սպառնում է խաթարել փխրուն առաջընթացը և հրահրել բռնության վտանգավոր վերսկսում»: Իսկ Հայաստանի ներկայացուցիչ Մհեր Մարգարյանը նշել է, որ իրավիճակը Լեռնային Ղարաբաղում մոտ է հումանիտար աղետի վերածվելուն։ ՄԱԿ-ում ԱՄՆ դեսպան Ռոբերտ Ա. Վուդը նշել է, որ «Լաչինի միջանցքի օգտագործումը խոչընդոտելն արգելափակում է խաղաղ գործընթացը և խաթարում միջազգային վստահությունը դրա նկատմամբ»:
Ինչպես նշել է Forbes-ը, հաշվի առնելով իրավիճակի վատթարացումը` չի կարելի չընդգծել, որ 2020 թվականի նոյեմբերի 9-ի հայտարարությամբ նախատեսված հրադադարի պարտավորությունները պետք է կատարվեն։ «Դա նշանակում է ապահովել մարդկանց, տրանսպորտային միջոցների և ապրանքների անվտանգ տեղաշարժը Լաչինի միջանցքով: Բացի այդ, մարդասիրական կազմակերպություններին և ՄԱԿ-ի գործակալություններին, հատկապես` Փախստականների հարցերով գերագույն հանձնակատարի գրասենյակին, պետք է անհապաղ տրամադրվի ազատ և անխոչընդոտ հասանելիություն տուժած բնակչությանը` անհրաժեշտ օգնություն ցուցաբերելու համար»,- ասվում է հրապարակման մեջ։–0–
