Պուտին. ամենազգայուն հարցերից մեկը Ղարաբաղի շուրջ անվտանգության ապահովման հետ կապված մթնոլորտն է

ԵՐԵՎԱՆ, 7 սեպտեմբերի./Նովոստի–Արմենիա/. ՌԴ նախագահ Վլադիմիր Պուտինը չորեքշաբթի ՀՀ վարչապետ Նիկոլ Փաշինյանի հետ հանդիպման ժամանակ հայտարարել է, որ նրանք մշտական կապի մեջ են Ղարաբաղի թեմայով, գրում է ՏԱՍՍ–ը։

«Իհարկե, ամենազգայուն հարցերից մեկը Լեռնային Ղարաբաղի շուրջ անվտանգության ապահովման հետ կապված մթնոլորտն է։ Մենք ձեզ հետ անընդհատ խոսում ենք այդ մասին, մշտական կապի մեջ ենք», – ասաց Պուտինը։

ՌԴ նախագահի խոսքով, երկրների հարաբերություններն ընդհանուր առմամբ զարգանում են բոլոր ուղղություններով։

Պուտինը հիշեցրել է նաև միջպետական կազմակերպությունների շրջանակում, այդ թվում` ՀԱՊԿ–ում համագործակցության մասին։ Առաջիկայում նախատեսվում են միջոցառումներ Շանհայի համագործակցության կազմակերպության մասով Ուզբեկստանում, այնտեղ «հնարավորություն կլինի ևս մեկ անգամ տեսնվել, խոսել բոլոր գործընկերների հետ»։–0–