Փաշինյան–Ալիև հանդիպում այս պահին նախատեսված չէ. ՀՀ ԱԳ նախարար

ԵՐԵՎԱՆ, 5 նոյեմբերի./Նովոստի–Արմենիա/. ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպում այս պահին նախատեսված չէ, հինգշաբթի լրագրողներին ասաց ՀՀ ԱԳ նախարար Զոհրաբ Մնացականյանը։

«Փաշինյան–Ալիև հանդիպում չեմ կարող ասել, որ այս պահին նախատեսված է, սակայն երբ կլինի, մենք կտեղեկացնենք», – ասաց Մնացականյանը։

Ինչ վերաբերում է ԱԳ նախարարների մակարդակում հանդիպման անցկացմանը, նա նշեց, որ վերջին հանդիպումը տեղի է ունեցել Ժնևում և շարունակվում է ամենօրյա աշխատանք համանախագահների հետ բոլոր մակարդակներում։

«Ամեն ինչ կախված է իրավիճակից և դրա զարգացումից։ Հիմա մենք հետապնդում ենք կոնկրետ նպատակներ, որոնք արտահայտված են հոկտեմբեր 10–ի հայտարարության 4 կետերում», – ասաց Մնացականյանը։–0–