Խծաբերդն ու Հին Թաղերը պետք է մնան հայկական ուժերի վերահսկողության ներքո. Փաշինյան (ՎԻԴԵՈ)
12:49
14 Դեկտեմբերի 2020
ԵՐԵՎԱՆ, 14 դեկտեմբերի./Նովոստի–Արմենիա/. Ռազմական իրադրության ամենալուրջ սրումն ենք ունեցել նոյեմբերի 9-ից ի վեր: Այս մասին ասաց ՀՀ վարչապետ Նիկոլ Փաշինյանը Facebook–յան իր էջի ուղիղ եթերի ժամանակ` անդրադառնալով վերջին օրերի իրադարձություններին:
«Նախորդ շաբաթ օրը օգտվելով այն փաստից, որ ռուս խաղաղապահները դեռևս չեն տեղակայվել տվյալ հատվածում՝ ադրբեջանական ուժերի հատուկ նշանակության ստորաբաժանումները գրոհ են ձեռնարկել Արցախի Հադրութի շրջանի Հին Թաղեր և Խծաբերդ գյուղերի ուղղությամբ և հսկողության տակ առել այդ բնակավայրերը: Շտապեմ ասել, որ այդ հատվածում քաղաքացիական բնակչություն չի եղել: Գործողության հետևանքով Արցախի պաշտպանության բանակի 6 զինծառայող վիրավորվել է, տեղեկություններ կան այլ տուժածների մասին, որոնք ճշտվում են, ինչու են ճշտվում, որովհետև տեղանքը, որտեղ կարող են լինել տուժածներ, այս պահին անմատչելի է, և միջոցներ են ձեռնարկվում՝ այնտեղ հասանելիություն ապահովելու համար»,- ասաց վարչապետը:
Նա նշեց, որ ինչպես երեկ տեղի ունեցած ԱԽ նիստի ընթացքում է ասել, առանձին քննարկման թեմա է եղել այն, թե ինչու ռուս խաղաղապահները չեն տեղակայվել Խծաբերդի և Հին Թաղերի հատվածներում:
Загружается новость ... "Лево"
Փաշինյանը նշեց, որ շաբաթ և կիրակի օրերին արդեն խաղաղապահները տեղակայվել են, հրապարակել են իրենց պատասխանատվության գոտու թարմացված քարտեզը, որտեղ ներառված են նաև Խծաբերդ, Թաղավարդ գյուղերը և հարող տարածքները:
«Սա նշանակում է, որ Ռուսաստանի Դաշնության խաղաղապահները պետք է ապահովեն այդ տարածքի կարգավիճակի համապատասխանությունը՝ նոյեմբերի 9-ի եռակողմ հայտարարության դրույթներին: Սա իր հերթին նշանակում է, որ քանի որ ամսի 9–ի դրությամբ այդ տարածքը եղել է հայկական ուժերի վերահսկողության նեքո, ապա պետք է շարունակի մնալ ՀՀ ուժերի վերահսկողության ներքո», – նշել է Փաշինյանը:
Նրա խոսքով, Ադրբեջանի կողմից ձեռնարկված գործողություններն ունեն բացահայտ սադրիչ բնույթ։
«Դրանք ուղղված են նաև Արցախում ռուս խաղաղապահների ներկայության արժեզրկմանը։ Նրանք ուզում են ցույց տալ, որ խաղաղապահներն ի վիճակի չեն կանգնեցնել իրենց կողմից ձեռնարկվող սադրանքները, և Խծաբերդ–Հին Թաղեր հատվածի ճակատագիրը ՌԴ խաղաղապահ առաքելության առաջին լրջագույն փորձությունն է», – ասել է Փաշինյանը։
Դեկտեմբերի 12-ին ադրբեջանական զինված ուժերի ստորաբաժանումները, կուտակելով հավելյալ անձնակազմ և զինտեխնիկա, այդ թվում նաև ծանր հրետանային միջոցներ, կոպտորեն խախտելով նոյեմբերի 9-ին ստորագրված եռակողմ հայտարարության պահանջները, հարձակում են նախաձեռնել Արցախի Հանրապետության Հադրութի շրջանի Հին Թաղեր և Խծաբերդ գյուղերի ուղղությամբ։
Ինչպես հայտնում է ՀՀ ՊՆ մամուլի ծառայությունը, մի քանի ժամ տևած մարտերի արդյունքում հակառակորդին հաջողվել է մտնել Հին Թաղեր գյուղ, ինչպես նաև ընդհուպ մոտենալ Խծաբերդ գյուղին։
Ադրբեջանական սադրանքի արդյունքում վերսկսված մարտական գործողությունների հետևանքով հայկական կողմն ունի վեց վիրավոր, հակառակորդն ունի զոհեր և վիրավորներ։ Ադրբեջանական կողմի գործողություններն անմիջապես քննարկման առարկա են դարձել Արցախում տեղակայված Ռուսաստանի խաղաղապահ զորախմբի ղեկավարության հետ։
Խոսքը Ադրբեջանի կողմից օկուպացված Հադրութի շրջանի տարածքի մասին է, բացառությամբ` երկու բնակավայրերի (Հին Թաղեր և Խծաբերդ, խմբգր.), որոնք մնում են հայկական ուժերի վերահսկողության տակ։–0–