ՀՀ ՊՆ մամուլի քարտուղարը հերքել է Արցախում դիվերսիայի մասին լուրերը

ԵՐԵՎԱՆ, 27 նոյեմբերի./Նովոստի–Արմենիա/. ՀՀ պաշտպանության նախարարության մամուլի քարտուղար Արծրուն Հովհաննիսյանը հերքել է Արցախում դիվերսիայի մասին լուրերը։

 Երեքշաբթի news.am–ը, հղում անելով սեփական աղբյուրներին, տեղեկացրել էր, որ «Արցախի զինված ուժերը նախօրեին գիշերը կասեցրել են ադրբեջանական խոշոր դիվերսիոն ներթափանցման  փորձ։ Դիվերսիոն ներթափանցման փորձն իրականացվել է Մարտակերտի ուղղությամբ երկու խմբերով՝ 20 և 14 հոգուց բաղկացած։ Հայկական կողմը, գործելով օպերատիվ, կանխել է հակառակորդի գործողությունները, ինչի արդյունքում սկսվել է ինտենսիվ փոխրաձգություն։ Ադրբեջանական կողմը, տալով առնվազն մեկ ծանր վիրավոր, հետ է նահանջել, վիրավոր դիվերսանտին տանելով իր հետ։ Հայկական կողմից տուժածներ չկան»։

«Դիվերսիայի մասին լուրը չի համապատասխանում իրականությանը։ Այսքանը», – տեղեկացրել է Հովհաննիսյանը Facebook–յան իր էջում։
Ավելի ուշ news.am–ը տեղեկացրել է, որ Արցախի ՊՆ մամուլի քարտուղար Սենոր Հասրաթյանը չի հաստատել և չի հերքել դիվերսիայի մասին լուրերը։

Միաժամանակ Արցախի պաշտպանության նախարարության պաշտոնական կայքում միջադեպի մասին հաղորդագրություն չկա։–0–