ԵՐԵՎԱՆ, 26 հուլիսի./Նովոստի–Արմենիա/. Արցախի ԱԳ նախարար Դավիթ Բաբայանը Արցախի հանրային հեռուստաընկերությանը տված հարցազրույցում հայտարարել է, որ եթե Ադրբեջանը սկսի լայնամասշտաբ պատերազմ, դա կլինի պատերազմ նաև Ռուսաստանի դեմ։
«Նա (Ադրբեջանը, խմբգր.) պատրա՞ստ է դրան, կարծում եմ, որ` ոչ։ Եվ դա նրան պետք չի», – կարծում է Բաբայանը։
Բացի այդ, նրա խոսքով, բնական է, որ Արցախի բնակչությունը մինչև վերջ պայքարելու է, «քանի որ մենք արդեն տեղ էլ չունենք գնալու»։
«Այդ պատճառով պատերազմի հավանականությունն այստեղ այնքան քիչ է, որ մոտ ապագայում համենայն դեպս չարժե սպասել դրան։ Բայց տարածելով խոսակցություններ` նրանք (ադրբեջանական կողմը, խմբգր.) այդ կերպ փորձում են հասնել նրան, որպեսզի այստեղ սկսվի բնակչության արտահոսք, որպեսզի մարդիկ միշտ վտանգ զգան, որպեսզի վստահ չլինեն վաղվա օրվա հարցում։ Այդ պատճառով բոլոր խոսակցություններին պետք է համապատասխան վերաբերվել», – ընդգծել է նա։
Արցախի ԱԳ նախարարը նշել է, որ այսօր, քանի դեռ ռուս խաղաղապահներն Արցախում են, լայնամասշտաբ պատերազմ պարզապես իրական չէ։
«Կարծում եմ, որ նրանք կմնան բավականին երկար, քանի որ իրական չի լինի առաջիկա հինգ տարում կարգավորել ղարաբաղա–ադրբեջանական հակամարտությունը։ Իսկ եթե իրական չէ կարգավորել հակամարտությունը, նշանակում է, որ խաղաղապահ առաքելությունը պետք է շարունակվի», – ասել է Բաբայանը։
«Եթե իրականացնենք նորմալ, ճիշտ քաղաքականություն, եթե մեր պետականաշինությունը, արտաքին քաղաքականությունը ճիշտ լինի, կան բոլոր նախադրյալները, որ Ղարաբաղը կմնա, կապրի, կուժեղանա և կբարգավաճի», – եզրափակել է Բաբայանը։–0–