ԵՐԵՎԱՆ, 15 դեկտեմբերի./Նովոստի–Արմենիա/. Արցախի նախագահ Արայիկ Հարությունյանն իր Facebook–յան էջում հրապարակել է ռեպորտաժ, որում ադրբեջանցի երկու դիվերսանտների` Դիլհամ Ասկերովի և Շահբազ Գուլիևի կողմից սպանված 17–ամյա Սմբատ Ցականյանի ծնողները նշում են, թե ինչու են համաձայնվել գերիների փոխանակմանը։
«Հաշվի առնելով որոշ լրատվամիջոցներում, սոցիալական հարթակներում և քաղաքական շրջանակներում տեղ գտած մտահոգությունները՝ հարկ եմ համարում հանրայնացնել ադրբեջանցի երկու դիվերսանտների՝ Դիլհամ Ասկերովի և Շահբազ Գուլիևի, արտահանձնման որոշման շարժառիթները: Այն ընդունվել է Սմբատ Ցականյանի ծնողների հետ համակողմանի քննարկման արդյունքում նրանց համաձայնությունն ստանալուց հետո», – գրել է Հարությունյանը:
Նա նաև նշել է, որ պատասխանատու այս որոշումը նպաստել է ոչ միայն գերիների առաջին խմբի վերադարձին, այլ նաև կերաշխավորի հաջորդ խմբերին հայրենիք վերադարձնելը:
Загружается новость ... "Лево"
«Խորին երախտագիտությունս եմ հայտնում Սմբատ Ցականյանի ծնողներին՝ Մեխակ և Կարինե Ցականյաններին, ցուցաբերած պատասխանատվության և քաղաքացիական բարձր գիտակցության համար», – գրել է Արցախի նախագահը։
Գերիների վերադարձի մասին
Դեկտեմբերի 14–ին ռուս խաղաղապահների միջնորդությամբ տեղի է ունեցել գերիների փոխանակում, Ադրբեջանից Հայաստան է տեղափոխվել պաշտոնապես հաստատված 44 մարդ։ Ռուսական խաղաղապահ ուժերի հրամանատարն Ադրբեջանին է փոխանցել 12 մարդ։
Ինչպես տեղեկացրել են իրավապաշտպաններ Արտակ Զեյնալյանն ու Սիրանուշ Սահակյանը, հայրենիք են վերադարձել լայնամասշտաբ պատերազմի հետևանքով գերեվարված զինծառայողներ և մինչև պատերազմը գերեվարված քաղաքացիական անձինք, որոնց շահերի պաշտպանությամբ փաստաբանները զբաղվել են Մարդու իրավունքների եվրոպական դատարանում։
Հայաստանը գերիների փոխանակման գործընթացում համաձայնել էր կիրառել «բոլորը բոլորի դիմաց» սկզբունքը։ Առաջարկվում է ստեղծել մեխանիզմ, որով նոր գերիների հայտնաբերման դեպքում կողմերից յուրաքանչյուրը պարտավորվում է վերադարձնել նրանց առանց նախապայմանների։
Արցախի պատերազմի ժամանակ գերեվարված կամ անհետ կորած հայերի հստակ թիվը հայտնի չէ։ Համացանցում հայտնվում են տեսանյութեր, որոնցում Ադրբեջանում գերության մեջ հայտնված հայ զինծառայողներն ու խաղաղ քաղաքացիները ենթարկվում են ծաղրանքի և ստորացուցիչ վերաբերմունքի։
Դիլհամ Ասկերովը և Շահբազ Գուլիևը, զինված խմբի կազմում, 2014թ.–ին ապօրինի մուտք են գործել Արցախի Հանրապետության տարածք: Այս հանցավոր խմբի անդամները կատարել են մի շարք ծանր և առանձնապես ծանր հանցագործություններ, այդ թվում՝ 17-ամյա Սմբատ Ցականյանի առևանգումն ու սպանությունը, 43-ամյա Սարգիս Աբրահամյանի սպանությունը և 37-ամյա Կարինե Դավթյանի ծանր վնասվածքը: Ադրբեջանի քաղաքացիներ Գուլիևն ու Ասկերովը 2014 թվականին ԼՂՀ ընդհանուր իրավասության դատարանի կողմից դատապարտվել են 22 տարվա ազատազրկման և ցմահ ազատազրկման՝ դեռահասի սպանության, ԼՂՀ սահմանի ապօրինի հատման, զենքի պահման և լրտեսության, ինչպես նաև հայոց բանակի սպայի սպանության համար:–0–