ԵՐԵՎԱՆ, 12 դեկտեմբերի./Նովոստի–Արմենիա/. ԵԱՀԿ Մինսկի խումբը որևէ դեր չի խաղացել ղարաբաղյան հակամարտության կարգավորման հարցում։ Այս մասին հայտարարել է Ադրբեջանի նախագահ Իլհամ Ալիևը` շաբաթ օրն ընդունելով ԵԱՀԿ ՄԽ ֆրանսիացի և ամերիկացի համանախագահներ Ստեֆան Վիսկոնտիին և Էնդրյու Շոֆերին, հաղորդում է ՏԱՍՍ–ը։
«Ցավոք, Մինսկի խումբը որևէ դեր չի խաղացել հակամարտության կարգավորման հարցում, չնայած որ այն 28 տարվա ընթացքում ունեցել է դրա մանդատը։ Ես 17 տարի մասնակցել եմ բանակցություններին։ Սակայն, չնայած Մինսկի խումբը հանդես էր գալիս գաղափարներով և փորձում էր ստեղծագործ մոտեցում ցուցաբերել, դա որևէ արդյունք չտվեց», – ասել է Ալիևը։
Ադրբեջանի առաջնորդն ընդգծել է, որ հակամարտության կարգավորումն ամբողջությամբ փոխել է իրավիճակը տարածաշրջանում։
Загружается новость ... "Лево"
«Հիմա տարածաշրջանում բացարձակապես նոր իրավիճակ է», – ընդգծել է Ալիևը։
Նրա խոսքով, նա համաձայն է Ռուսաստանի նախագահ Վլադիմիր Պուտինի գնահատականի հետ այն մասին, որ ղարաբաղյան հակամարտությունն արդեն մնացել է պատմության մեջ։
Ալիևը նաև հայտարարել է, որ ԵԱՀԿ Մինսկի խմբի համանախագահների այցը Բաքու իրենց սեփական նախաձեռնությունն է, նա իրենց չի հրավիրել, ասվում է Ալիևի ելույթի տեքստում, որը մեջբերում է ԱզերՏաջ պետական լրատվական գործակալությունը։
«Այստեղ այցելելը ձեր գաղափարն է։ Ես դա կարող եմ կրկին ասել տեսախցիկների առջև։ Ես չեմ հրավիրել Մինսկի խմբին։ Բայց երբ ինձ տեղեկացրեցին, որ Մինսկի խումբն ուզում է այցելել, ես ասացի` թող գան, դեմ չեմ։ Միգուցե նրանք ինձ ասելու բան ունեն», – նշել է Ալիևը։
Ընդունելությանը ներկա են եղել նաև Ադրբեջանում ՌԴ դեսպան Միխայիլ Բոչարնիկովն ու ԵԱՀԿ գործող նախագահի անձնական ներկայացուցիչ Անջեյ Կասպրշիկը։ Ռուս դեսպանը նշել է, որ ՌԴ կառավարությունը միշտ նշել է Մինսկի խմբի կարևորությունը։
«Այդ պատճառով մենք մասնակցել և այսօր էլ մասնակցում ենք այս խմբում», – ասել է նա։
Ինչպես «Նովոստի–Արմենիա» գործակալությանը հայտնել է ՀՀ ԱԳՆ մամուլի քարտուղար Աննա Նաղդալյանը, ԵԱՀԿ Մինսկի խմբի համանախագահները Երևան կայցելեն դեկտեմբերի 13–ին։–0–